Ekipa TJFP aprezenta programa ba PM

0
48
Primeiru Ministru, Rui Maria de Araújo

DILI (TATOLI)– Ekipa téknika jestaun finansas públika (TJFP) ohin, Segunda (12/06) aprezenta estruktura no programa ba primeiru ministru Rui Maria de Araujo, iha Palasio Governo.

Diretór Jerál Ministériu Finansas Januario Gama informa, ekipa ne’e sei servisu atu difine no estabelese mekanismu no estratejiku finansas públika iha Timor-Leste.

“Ekipa ne’e forma bazeia ba aprovasaun Konsellu Ministru tuir dekretu governu númiru 17/2017 ho objetivu atu haree jestaun finansas públika iha Timor-Leste durante tinan lima,” Januario Gama informa ba jornalista sira hafoin hasoru malu ho xefi governu.

Ekipa TJFP ne’e sei lidera hosi Epi Orleans husi gabinete Primeiru Ministru no diretor jeral MF Januario Gama.

Atividade dahuluk husi komisaun ne’e mak forma estrutura, estabelese sekretariadu, halo supervizaun no monitorizasaun ba despeza Orsamentu jerál Estadu, tinan 2017.

“Ita sei halo uluk kona-bá despeza governu 2017, segundu sei asumi papel hanesan monotorizasaun no supervizaun ba lalaok jestaun finansas públika,” Januario Gama haktuir tan.

Iha enkontru ho PM Rui, ekipa ne’e aprezenta ba PM konaba regulamentu no prosedementu sekretariadu inklui programa servisu ne’ebé sei hahú iha fulan Juñu too Dezembru tinajn ida ne’e.

No Primeiru Ministru fo instrusaun atu prepara ona kalendariu servisu no halo analiza ba funsionamentu grupo traballu nee.

Iha parte seluk, Epi Orleans hateten, programa ne’e sei implementa durante tinan 5 hahu 2107 -2021.

Kompozisaun ekipa ne’e mai hosi Gabinete Primeiru Ministru, Ministériu Finansas, Ministériu Administrasaun Estatal, Aagensia Dezenvolvimentu Nasionál, Auditoria estadu no seluktan.

(Jornalista: Agapito dos santos, Editór : Manuel Pinto).

HUSIK IDA HATÁN