Dom Carlos Louva Maturidade Povu Timor

0
165
Dom. Carlos Filipe Ximenes Belo

DILI, (TATOLI) – Bispu Emeritu Dioseze Dili, Dom. Carlos Filipe Ximenes Belo louva no apresia maturidade povu Timor-Leste.

“Agradese tebes ba vizita no louva tebes povu Timor nia maturidade hodi kria no prezerva nafatin pás no hakmatek iha  eleisaun prezidensiál ne’ebé foin liu ba”, hateten Premiadu Nobel da Paz 1996 ne’e ba komitiva Ministru Negósiu Estranjeiru no Kooperasaun ne’ebé diriji husi vise-ministru negósiu estranjeiru, Roberto Soares iha Konventu Salezianu, Porto durante vizita kortezia.

Apresiasaun ne’e mosu bainhira komitiva relata situasaun reál iha rai laran no esforsu ne’ebé maka Governu halo hodi responde ba dezafiu ne’ebé Nasaun hasoru.

Liuhusi komunikadu MNEK ba Ajénsia Tatoli, ohin katak Bispu Emeritu Dioseze Dili, Dom. Carlos Filipe Ximenes Belo mós apresia esforsu governu tan loke mós sentru votasaun iha Portugal.

“Apresia hotu Governu nia esforsu hodi loke sentru votasaun ba eleisaun prezidensial iha Portugal atu komunidade sira iha ne’ebá bele ezerse sira nia direitu”, afirma bispu emeritu ne’e.

Don Carlos mós hato’o hela ba Vise-Ministru, Roberto Soares katak nia parte sei reza nafatin ba povu no Timor-Leste. “Ha’u sei reza nafatin ba povu no nasaun Timor-Leste”, nia hato’o.

Jornalista: Rafy Belo

Editora: Rita Almeida

HUSIK IDA HATÁN