Dekretu Lei Lisensiamentu Atividade Komersiál Hetan Aprovasaun

0
142
Reuniaun Konsellu-Ministru, ohin. Foto GPM.

DILI, (TATOLI) – Ministru Estadu, Koordenadór Asuntu Ekonómiku (MEKAE), Estanislau Aleixo da Silva aprezenta Dekretu Lei Lisensiamentu Atividade Komersiál ne’ebé hetan ona aprovasaun  iha reuniaun Konsellu-Ministru nian, ohin.

Dekretu Lei ne’e hanesan prioridade ida tanba Lei Sosiedade Komersiál iha Prezidente Repúblika sesante, Taur Matan Ruak promulga ona no semana kotuk foin lalais ne’e Prezidente Repúblika atuál, Francisco Guterres Lú-Olo publika mós Lei Investimentu.

“Lei Lisensiamentu Komersiál ne’e implementa Lei Sosiedade Komersiál nomós haree ba Lei Investimentu, haree ba prosedimentu tékniku ba lisensiamentu komersiál no SERVE mak sei halo rejistu”, esplika.

Hatutan, lisensiamentu komersiál debaixu risku SERVE bele fó, maibé médiu, altu risku ne’e depende ba liña ministeriál. Sira tenke kumpri prosedimentu kona-ba lisensiamentu ba sosiedade komersiál, sosiedade pur kuota no sosiedade anónimá.

Antes, tipu kompañia iha haat maibé ho lei foun ne’e hatún ba rua, nune’e ho Dekretu Lei ne’e bele implementa. Aleinde ne’e, ohin aprova mós Dekretu Governu kona-ba formuláriu ne’ebé bainhira kompañia sira halo rejistu tenke prienxe no Dekretu Lei sobre nesesidade ba empreza sira média no boot para obrigatóriu iha fiskál úniku.

“Ohin Konsellu-Ministru aprova hotu ona, rua ne’e Dekretu Governu, lapresiza lori bá Prezidente Repúblika maibé ida fali ne’e hanesan Dekretu Lei depois sei lori ba Prezidente Repúblika mak promulga no Governu sei haruka mós ho karta ida katak ida ne’e prioridade no Governu foun mai lalika preokupa katak lei baze iha hotu ona para sira bele hala’o servisu bá oin”.

Jornalista: Maria Auxiliadora

Editora: Rita Almeida

HUSIK IDA HATÁN