CPLP Sei Debate Turizmu no Dezafiu Implementasaun ODS

0
70

DILI, (TATOLI) – Governu no estadu membru CPLP (Comunidade dos Países da Língua Portuguesa) sei hala’o debate kona-ba turizmu no dezafiu implementasaun Objetivu Dezenvolvimentu Sustentável (ODS), ajenda 2030 iha nasaun CPLP sira, iha Brasil, kinta (29/6).

Reuniaun ne’e organiza husi Ministériu Turizmu Repúblika Federativa Brasil iha ámbitu reuniaun da-sia ministru turizmu komunidade ho lian ofisiál portugés nian, haktuir nota informativa CPLP.

Hafoin Timor-Leste entrega koordenasaun ministeriál iha nia prezidénsia rotativa ba Brasil, ajenda ne’e sei kontempla adosaun planu asaun ba périodu 2017-2019 tuir liña orientadora planu estratéjiku kooperasaun turizmu CPLP nian.

Iha reuniaun da-lima pontu fokál turizmu CPLP nian, molok reuniaun ministeriál delegadu estadu membru CPLP nian, sei debate kona-ba serbisu sira ne’ebé sei hala’o iha tempu tuir mai.

Hodi hanoin hikas kona-ba konferénsia da-sanulu xefe estadu no governu CPLP sauda doasaun istórika nasaun unida nian ne’ebé hala’o iha 25 setembru 2015, ajenda 2030 kona-ba ODS.

Iha simeira Brasília ne’ebé hala’o iha 31 outubru no 1 novembru 2016, xefe estadu no governu husi komunidade ho lian ofisiál portugés ne’e deklara hamutuk kona-ba ajenda 2030 nu’udar “planu asaun globál no vizaun komun hodi alkansa objetivu dezenvolvimentu sustentável 2030 iha dimensaun tolu: sosiál, ekonómika no ambientál”.

Entretantu, nasaun ne’ebé hamahan aan iha CPLP ne’e mak Portugal, Brasil, Angola, Guiné-Bissau, Moçambique, São Tomé e Príncipe, Cabo-Verde, Timor-Leste Guiné Equatorial.

Enkuantu nasaun observadór CPLP nian mak Mauritius, Senegal, Georgia, Namibia, Turkia, no Japaun.

Jornalista: Rafy Belo

HUSIK IDA HATÁN