CNE Atribui Ona Kalendáriu Kampaña ParPol

0
81
Prezidente CNE, Alcino Barris. Foto Dokumentasaun Tatoli.

DILI (TATOLI) – Comissão Naçional das Eleições (CNE) atribui ona kalendáriu kampaña ba partidu polítiku (ParPol) hotu atu aban, Tersa, 20 Juñu bele hala’o kampaña ba eleisaun lejislativa ne’ebé monu iha 22 Jullu.

“Ami hosi orgaun eleitorál fahe hotu ona oráriu kampaña ba partidu polítiku hamutuk 21, observadór nasionál no internasionál, Polisia Nasionál Timor-Leste (PNTL), mídia sira no seluk tan atu ema hotu bele asesu prosesu festa demokrásia,” Prezidente CNE, Alcino Barris informa ba jornalista sira iha CNE, Kaicoli, Ohin (19/06).

Tuir Prezidente CNE, atribuisaun kalendáriu kampaña ba partidu polítiku iha Domingu mezmu loron boot, maibé sira iha hotu ona koñesimentu kona-ba tempu kampaña ne’ebé determinadu.

Enkuantu, antes ne’e partidu polítiku sira hatama ona kalendáriu kampaña depois hetan reajustamentu hosi CNE ho konkordansia mutua hosi partidu polítiku 21 ne’ebé admitidu hosi tribunál rekursu atu konkore eleisaun parlamentár 2017.

Maske nune’e, partidu polítiku no koaligasaun partidária sira ida-idak obrigatoriamente submete kalendáriu kampaña ba CNE loron lima antes períodu kampaña eleitorál, haktuir ba artigu 10, Dekretu Governu númeru. 18/2017.

Hanesan segimentu ba dekretu governu ne’e, iha loron 12 no 13 Juñeu, partidu polítiku no koaligasaun partidária balun konsege haruka kalendáriu kampaña mai CNE no balun foin submete iha 14 no 16 Juñu.

Iha loron 16 no 17 Juñu, Comissão Nacional das Eleições (CNE) halo verifikasaun ba kalendáriu sira no konsege detekta koinsidénsia relasiona fatin no oras kampaña, nune’e, iha 17 Juñu CNE konvida reprezentante partidu politiku no koaligasaun partidária hodi buka solusaun hafoin orgaun eleitorál bele halo produsaun kalendáriu.

Entretantu, Partidu polítiku sira kompostu hosi Bloku Unidade Popular (BUP), Associação  Popular Monarquia Timorense (APMT), Kmanek Haburas Unidade Nasionál Timor-Oan (KHUNTO), Partido Esperança da Patria (PEP), Partido Socialista de Timor (PST), Partido Desenvolvimento Popular (PDP), Congresso Nacional de Reconstrução de Timor-Leste (CNRT), Partidu Republikanu (PR), União Democrática Timorense (UDT), Partido Democrata Cristão (PDC), Movimento Libertasaun Povu Maubere (MLPM), Partido da Libertação Popular (PLP), Partido Democratico (PD), Unidade Nacional Democrática da Resistencia Timorense (UNDERENTIM), Partido Unidade Desenvolvimento Democratido (PUDD), Partido Timorense Democrático (PTD), Partido Frente Mudansa, Partido Social Democrata (PSD), Centro Acção Social Democrata Timorense (CASDT), Partido do Desenvolvimento Nacional (PDN) no Frente Revolucionario do Timor-Leste Independente (FRETILIN).

(Jornalista : Zezito Silva, Editór : Manuel Pinto)

 

HUSIK IDA HATÁN