CNE Aprova Modelu Buletim Votu

0
82
Prezidente CNE, Alcino de Araújo Baris. Foto mídia CNE

DILI, (TATOLI) – Comissão Nacional de Eleições (CNE), ohin aprova modelu buletim votu ne’ebé aprezenta husi Servisu Tékniku Administrativu Eleitorál (STAE) iha edifisiu CNE Kaikoli, Dili.

Prezidente CNE,  Alcino de Araújo Baris hateten aprovasaun ne’e hetan ona konkordansia entre STAE ho partidu polítiku 21 iha kuarta (21/6).

“Ohin ami konklui ona preokupasaun hosi Partidu Demokratiku nian, CNE aprova  depois sei submete para halo imprimeʺ, dehan nia.

Diretór Jerál STAE, Acilino Manuel Branco hateten STAE no partidu polítiku sira konkorda ona ho modelu buletin votu ba eleisaun parlamentár.

“STAE ho partidu polítiku sira konkorda ona kona-ba sira nia sigla bandeira no emblema, ohin ita lori mai iha ne’e aprezenta ba CNE hodi aprovaʺ, esklarese.

Tuir planu, STAE sei entrega modelu buletin votu ba grafika nasionál hodi hahú imprime, iha loraik ne’e. “Ohin loraik ne’e, (22/6) ita sei entrega ba grafika nasionál atu hahú imprimeʺ, reforsa.

Kualidade  Buletim Votu

Alcino Baris husu ba governu atu imprime buletim votu ba eleisaun parlamentár tenke di’ak liu eleisaun prezidensiál.

“CNE kontinua preokupa ba grafika nasionál atu imprime buletin ho kualidadeʺ, preokupa. Tuir levantamentu CNE, suratahan laiha kualidade, buradu, númeru imprisaun la tuir ordem no  seluk tan durante eleisaun prezidensiál.

“Buletim votu materiál sensitivu tanba ne’e tenke iha kualidade para evita disturbu ne’ebé sei mosu iha eleisaunʺ, hatutan.

Atu responde preokupasaun ne’e maka CNE haruka ona ba Primeiru Ministru, Rui Maria de Araújo atu haree didi’ak kualidade imprisaun husi Grafika Nasionál. Maske nune’e, CNE fiar governu sei hadi’a kualidade.

Tuir Diretór Jerál STAE, prosesu imprime buletin votu husi gratifika nasionál durante semana rua. “Periode ne’ebé ita fó ba grafika atu halo imprime durante semana rua, depois ita organiza atu distribui ba munisípiu no rai liurʺ, katak Acilino.

Produsaun buletim votu bazeia ba númeru eleitór ne’ebe STAE  rejistu hamutuk rihun 760 resin iha rai liur no rai laran.

Jornalista: Agapito dos Santos

Editora: Rita Almeida

HUSIK IDA HATÁN