Citilink husu deskulpa ba SERVE

0
322
Diretór Ezekutivu SERVE, Florêncio Sanches.

DILI (TATOLI)-Diretór Ezekutivu SERVE, Florêncio Sanches informa, iha semana kotuk, SERVE simu karta ofisiál husi prezidente Citilink hodi husu deskulpa tanba prosesu naruk uitoan no hein hodi trata dokumentu ne’ebé Lei Timor-Leste nian husu, hafoin halo rejistu iha SERVE.

“Aviaun tama mai ona, ita rasik mak loke odamatan, maibé to’o ikus ita rasik mak lahatete katak kumpri iha ne’ebé. Agora sira atu kumpri, maibé  prosesu naruk iha parte sira-nian,” Florêncio Sanches informa ba ba TATOLI foin lalais ne’e iha Matadouru.

Servisu Rejistu no Verifikasaun Emprezariál (SERVE) halo ona verifikasaun ba dokumentu kompañia Citilik nia no hetan katak na’in ba empreza ne’e iha ema na’in-rua no entre ida ne’e mak Garuda Indonesia, nune’e Citilink sei trata dokumentu iha Indonézia hafoin bele mai rejistu iha SERVE.

Foufoun Citilink hala’o sira-nia atividade komersiál sein dokumentu rejistu komersiál nian maibé hafoin husi parte SERVE levanta iha mídia, liu tiha semana ida empreza ne’e hatama kedan dokumentu.

Maibe bainhira SERVE verifika tuir lei, hetan katak Citilink ne’e nia na’in iha rua. No momentu rejistu Citilink lalori dokumentu hotu hodi entrega ba SERVE, tanba ida ne’e SERVE husu labele lori dokumentu Citilink nian de’it tanba nia na’in iha rua entaun sira filafali bá kompelta dokumentu.

Tuir artigu 26 no 27 husi Dekretu Lei 35/2012 aplika ba kompañia internasionál ne’ebé SERVE fó ba empreza ne’e hodi haree katak iha prosesu naruk tebes. Nune’e, sira halibur dokumentu no lori mai kompleta porsentu 70 de’it, tanba ne’e mak SERVE sujere ba kompañia tenke lori ba notariadu públiku Indonézia atu sertifika Citilink nia na’in loloos mak ida ne’ebé.

Hafoin sertifika tiha tenke lori fali ba embaixada Timor-Leste iha Jakarta atu verifika katak tebes ka la’e, hafoin lori mai iha ne’e maibé tenke ba Institutu Nasionál Linguístika (INL) atu halo tradusaun.

entertantu ho kazu Citilink nian, SERVE nia polítiku klaru katak, iha lei lima ne’ebé SERVE implementa mak Lei Sosiedade Komersiál númeru 4/2004, Dekretu Lei númeru 7/2017 sobre kódigu rejistu komersiál, Lei númeru 8/2008 kona-ba tributária, Dekretu Lei númeru 35/2012 liuliu artigu 26 no 27 kona-ba lian kompañia nian no Dekretu Lei  númeru 24/2011 sobre lisensiamentu komersiál, husi lei hirak ne’e Citilink seidauk kumpri ida.

(Jornalista : Maria Auxiliadora)//(Editor : Manuel Pinto)

HUSIK IDA HATÁN