Boxista Indonézia Kampiaun iha TRO

0
52
Reprezentante Sekretaria Estadu Juventude no Desportu (liman karuk) entrega hela tasa ba reprezentante Asosiasaun Boxe Belu (Indonézia) iha kompetisaun TRO Maliana. Imajen espesiál.

DILI (TATOLI)—Boxista hosi Asosiasaun Boxe Belu (Indonézia) sai kampiaun iha turnament Regional Open (TRO) ne´ebé hala´o durante loron haat (30 Maiu-02 Juñu 2017) iha Jináziu Maliana, Munisípiu Bobonaro, tanba rezulta medalla osan mean 3, perak 1 no perungu 2.

Medalla osan mean hetan hosi boxista Octavianus Bou hosi klase Bantam Senior, Inosentus Mau (klase Ringan Senior) no Didi Indarto hosi klase Welter Senior. Medalla Perak hetan hosi boxista Libertius G.H.A  hosi klase Welter Ringan Senior no medalla perungu hetan hosi Evaristus R. Leki (terbang senior) ho Mario B. Kali.

Xefi Asosiasaun Boxe Belu (Indonézia), Vincent Laka hateten maske ninia boxista sira la konsege hetan rezultadu tuir tarjetu sira nian ba medalla osan mean 4, maibé nia nafatin kontenti tanba konsege hetan medalla osan mean 3 iha kompetisaun ne´e.

Iha enseramentu TRO, Diretór Nasionál Desportu hosi Sekretaria Estadu Juventude no Desportu (SEJD), João Rodrigues apresia ba komunidade Munisípiu Bobonaro, tanba antusiazmu maka´as hodi asisti eventu ne’e to´o ramata.

Nia hatutan governu liuhosi SEJD sempre iha komprimisu atu apoiu eventu sira ne’e, tanba ne’e nia husu ba komunidade sira liu-liu joventude ne´ebé hadomi boxing, atu prepara án didi´ak nune’e karik eventu boxing mai loke fali iha ne’e (Bobonaro). (Jornalista: Xisto Freitas)

HUSIK IDA HATÁN