Bolloré sei halo operasaun ba Portu durante tinan 30

0
183
Vice Ministru Finansas, Helder Lopes

TIBAR (TATOLI)- Vise-Ministru Finansa, Helder Lopes hatete bazeia ba akordu ne’ebé Governu Timor-Leste asina ho kompañia Bolloré Ports mak kompañia sei halo dezeñu, konstrusaun no operasaun ba Portu Tibar durante tinan 30 ne’ebé inklui tinan tolu ba faze konstrusaun.

Antes ne’e, prosesu avaliasaun no preparasaun ba konstrusaun Portu Tibar halo dezde tinan balun liubá. Avaliasaun ne’e kobertura ba asuntu tékniku, ambientál, sosiál no sobre viabilidade projetu husi aspetu ekonómiku ho finanseiru.

Iha loron 3 Jullu 2016, Governu Timor-Leste asina akordu ho kompañia Bolloré hodi hahú implementa projetu ba konstrusaun portu Tibar.

Atu asegura konstrusaun portu Tibar bele la’o ho di’ak, Timor-Leste mós halo ona kontratu ho kompañia para halo supervizaun ba prosesu konstrusaun Portu Tibar ne’ebé hanaran independent engineering no kontratu ne’e asina ona iha loron 17 Maiu 2017.

Tanba portu ne’e halo liuhusi modalidade Parseiru Públiku Privadu (PPP) ne’ebé Governu tau osan nomós husi setór privadu. Husi parte Governu nian, kontribuisaun ba projetu ida ne’e transfere ona konta escrow account iha Dezembru 2016.

“Projetu ida ne’e, projetu PPP primeiru ne’ebé ita implementa iha ita-nia rain no kontribuisaun setór privadu iha portu ida ne’e nu’udar investimentu boot liu iha ita-nia rai-laran to’o agora,” Helder dehan iha Tibar, ohin.

Rafael Ribeiro, Managing Director of Bolloré Transport and Logistic hatutan, ba konstrusaun portu Tibar, Governu Timor-Leste sósiu osan U$129 hamutuk ho kompañia husi totál osan atu harii portu mak millaun U$490.

Nune’e, atu hahú prosesu konstrusaun sei halo konkursu públiku, bainhira konkursu ne’e hotu mak komesa hahú ona konstrusaun.

“Tanba kompañia barak mak tuir, ita sei presiza tempu para prosesu maibé konkursu la’o daudaun ona no ami sente katak sei hetan dalan ne’ebé di’ak.”

(Jornalista : Maria Auxilidora, Editor : Manuel Pinto)

HUSIK IDA HATÁN