Atu Proteje Konsumidór, AIFAESA Tenke Halo Inspesaun

0
92
Foto espesiál

DILI, (TATOLI) – Delegasaun Primeiru Ministru, Rui Maria de Araújo, atuál Sekretáriu Estadu, Arte no Kultura, Maria Isabel de Jesus Ximenes hatete Timor-Leste bele iha ai-han barak maibé Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) tenke halo inspesaun no fiskalizaun katak produtu sira ne’ebé iha di’ak ba saúde umana.

“Ita tenke fó protesaun ba ita-nia konsumidór sira atu konsome ai-han sira ne’ebé saudavel no kualidade no hanesan produtu kaleng sira iha supermerkadu no plástiku ne’ebé liu prazu kuandu liu ona ladún di’ak ba ita-nia saúde”, Sekretária Estadu ne’e hatete iha salaun Ministériu Solidariedade Sosiál iha ámbitu selebrasaun aniversáriu dahuluk AIFAESA nian, ohin.

Nune’e, AIFAESA halo ona fiskalizasaun no inspesaun ba ai-han sira ne’ebé tau iha supermerkadu no servisu ne’e tenke halo embora ema barak gosta no la’e maibé tenke halo para fó seguransa alimentár ho kualidade no produtu seluk ne’ebé di’ak ba TL.

AIFAESA mak iha kompeténsia atu halo inspesaun nomós fó instrusaun no determina koima bainhira empreza komete infrasaun tuir Dekretu Lei númeru 26/2016, 29 juñu 2016.

Vizaun AIFAESA mak hanesan entidade referénsia ida ba protesaun konsumidór sira, defeza ba saúde públika no promosaun ba konkorénsia leál entre opreradór ekonómiku nian no ho misaun importante rua mak halo avaliasaun kona-ba risku  iha kadeia alimentár no asegura nia komunikasaun no divulgasaun públika no transparente ba konsumidór sira nomós halo inspesaun no fiskalizasaun  no prevensaun ba kumprimentu lejislasaun ne’ebé regula ezersísiu kona-ba atividade ekonómika sira iha setór alimentár no la’ós alimentár.

Koordenadór AIFAESA, Abílio Oliveira Sereno hatete populasaun TL porsentu 80 sei dependente ba produtu ai-han importadu, tanba ne’e laiha dalan seluk atu garante saúde públika.

Koordenadór AIFAESA, Abílio Oliveira Sereno.

“Tan ita hotu mós konsumidór ho nune’e inevitavelmente iha área hadi’ak di’ak liután sistema kontrolu ba jéneru ai-han no laós ai-han, importante tebes. Tanba sé ita ko’alia kona-ba defeza ba konsumidór automátikamente defeza ba ita-nia án rasik”.

Ema hotu tenke konsiente katak saida de’it mak mak konsumu dalabalun nunka buka hatene  nia orijen, kompozisaun no kondisaun produtu ne’e rasik.

“Ho nune’e husu ita hotu kolabora no nakloke án tanba ho sistema kontrolu ne’ebé agora daudaun ita iha seidauk sufisiente, hakarak ka lakohi, komunikasaun no tatoli informasaun ne’ebé ita hetan mak tenke efetivu ho hanoin katak meiu hirak ne’e, ita iha mínimu possivel atu kontrola ita ida-idak nia konsumu relasiona ho produtu importadu hirak ne’ebé sirkula iha ita-nia rai”.

AIFAESA garante katak sei halo defeza ba saúde públika, promosaun ba integridade, responsabilidade  no onestidade hodi tane aas nafatin prinsípiu no valór fundamentál sira ne’ebé konsagra iha Lei Inan RDTL  ho fiar katak dezenvovimentu hanesan mós ukun rasik-án ida ne’e la mai husi ema ida maibé husi ema hotu nia esforsu.

Jornalista: Maria Auxiliadora

Editora: Rita Almeida

HUSIK IDA HATÁN