Antoninho Sai Boxista Favóritu iha TRO

0
53
Boxista Antoninho dos Santos (klaran). Imajen espesiál

DILI (TATOLI)—Boxista ho naran Antoninho dos Santos hosi Asosiasaun Boxe Munisípiu Ermera, sai boxista favóritu iha Turnament Regional Open (TRO) ne´ebé maka organiza hosi Federasaun Boxing Amadora Timor-Leste (FBATL) iha Jináziu Maliana, Munispiu Bobonaro, 30 Maiu-02 Juñu 2017.

Rezultadu ida ne’e foti hosi desizaun juri tanba durante iha jogu, Antoninho dos Santos maka hatudu jogu ne´ebé furak liu, kompara ho boxista sira seluk.

Iha jogu primeiru (31/05), boxista manu aman iha klase Layang Senior ne’e (Antoninho), kompete ho boxista Indonézia hosi Asosiasaun Boxe Belu, Indonézia ho naran Yosef J.Mela, Antoninho manán ho rezultadu númeru absoluta (angka mutlak) iha ronde 3.

Jogu segundu (01/06), Antoninho kontinua kontra boxista Indonézia hosi Asosiasaun Boxe Belu, Mario B. Kali. Antoninho manán ho rezultadu númeru to´o ronde  ramata. Jogu ba ikus iha finál (02/06), boxista favoritu ne’e fila kontra fali boxista hosi Asosiasaun Manatuto ho naran José Quintas. Antoninho kontinua manán ho rezultadu angka mutlak hodi sai hanesan manán na´in iha klase Layang Senior.

Antoninho dos Santos hateten jogu ida ne’e (sesta) hanesan ba dala ikus hodi buka primeiru lugár, tanba ne’e nia esforsu tomak para bele hetan kampiaun juara, maske kondisaun ladún fit.

“Maibé ohin ha´u joga ladún fit tanba hodi kalan ha´u toba tarde, tanba isin kolen. Ida ne’e maka halo ha´u joga kalan ne’e ladún másimu (lemah), maibé ha´u senti kontenti tanba jogu ikus iha finál ne’e ha´u konsege manán sai primeiru lugár ba Klase Layang Junior (49kg),” nia dehan ba jornalista sira bainhira ramata jogu iha sesta ne´e.

Hanesan boxista selesaun ne´ebé sei prepara ba eventu internasionál Sea Games Malázia, nia sei esforsu liu-tan para sai di´ak liu-tan, tanba eventu Sea Games ba reprezenta nasaun nia naran.

Entretantu, segunda lugár ba klase Layang Senior maka José Quintas no terseiru Mario B. Kali ho Frederico S.K. Primeiru lugár iha klase Layang Junior maka Rui Gonçalves, segundu lugár Tito B. no terseiru lugár Carolino ho Marciano de Jesus. (Jornalista: Xisto Freitas)

HUSIK IDA HATÁN