ANPM Konsulta Autoridade Lokál no Na´in Ba Rai Molok Esplora Rikusoin Rai Maran

0
144
Diretór ANP trata asuntu Legál no Kontiudu Lokál, Amado Hei, bainhira dadalia ho jornalista Ajénsia TATOLI.

OE-CUSSE (TATOLI)—Ministériu Petróliu, Rekursu no Minerais liuhusi Autoridade Nasionál Petróliu no Minerais (ANPM) sei halo konsultasaun públiku kona-ba Ezbosu Dekretu Lei Atividade Petróliu iha Rai Maran iha Rejiaun Autoridade Espesiál Oe-Cusse Ambeno (RAEOA), segunda (12/6).

Konsultasaun ne´e ho objetivu atu husu na´in ba rai no autoridade lokál sira nia opiniaun kona-ba Ezbosu Dekretu Lei refere para sira bele kompriende tanba atividade esplorasaun mina no gas iha rai maran sei afeta ba komunidade sira.

“Natureza atividade iha rai maran la hanesan iha tasi laran. Iha rai maran oin seluk oituan tanba afeta ba komunidade sira nia rai. Signifika katak estadu sei foti rai ne´e atu hala´o atividade mina ninian,” Diretór ANP trata asuntu Legál no Kontiudu Lokál, Amado Hei ba Ajénsia TATOLI iha Sub-Rejiaun Pante Makasar, RAEOA, sesta ne´e.

Amado esplika katak Ezbosu Dekretu Lei ida ne´e hatúr prinsípiu balun iha ne´ebá katak ema ne´ebé hetan afetadu hosi kauza esplorasaun minarai, sei hetan indeminizasaun. Lei Rai mós garante katak selu indeminizasaun ba rai ne´ebé maka Estadu foti.

“Konsultasaun ne´ebé maka sira halo iha Maubisse, Aileu no munisípiu sira seluk, populasaun no autoridade lokál kompriende lala´ok oinsá mina nian no konsidera katak ida ne´e importante,” nia haktuir.

Amado informa bainhira konsultasaun ramata sei lori ezbosu lei ba iha Konsellu Ministru para oinsá bele aprova hodi bele fó kbiit ba kompañia rua ne´ebé maka governu kontratu tiha ona iha fulan rua ba kotuk atu halo esplorasaun ba mina no gas iha rai maran.

Iha fulan kotuk mós governu kontratu ona kompañia ida hodi halo estudu ba rikusoin iha rai okos, maibé rezultadu seidauk fó sai. (Jornalista: Xisto Freitas)

 

HUSIK IDA HATÁN