Aniversariu UNTL Nakfila sai Loron Nasionál Ensinu Superiór TL

0
42
Ilustrasaun

DÍLI, (TATOLI)—Universidade Nacional Timor Lorosa’e (UNTL) komemora nia aniversáriu kada tinan iha 17 Novembru hahú nia ezisténsia iha 2000 hafoin Timor-Leste (TL) hetan nia indepedénsia totál.

Ministru Edukasaun, António da Conceição informa iha CCD (Centro Convenções de Díli), horseik katak governu liuhusi desizaun Konsellu-Ministru aprova ona data ida ne’e hodi sai nu’udar loron nasionál ba ensinu superiór sira iha Timor-Leste.

“17 Novembru nu’udar loron aniversáriu UNTL, sai nu’udar loron ensinu superiór públiku no privadu iha Timor-Leste,” informa governante ne’e.

Governante ne’e reforsa katak afiksasaun data ida ne’e fó rekoñesimentu ba UNTL nu’udar instituisaun ensinu superiór dahuluk iha nasaun ida ne’e.

Nune’e mós, nia informa katak data ida ne’e determinadu sai nu’udar loron nasionál ensinu superiór nian tanba bazea ba desizaun koletiva ne’ebé reitór ensinu superiór sira halo bainhira halo sorumutu dahuluk ho Primeiru-ministru, Rui Maria de Araújo iha Ministériu Edukasaun.

“Razaun ida ne’e, ami deside loron ida ne’e nu’udar loron nasionál ba ensinu superiór sira iha Timor-Leste,” informa tan ministru edukasaun ne’e.

Ministru António da Conceição mós informa katak governu liuhusi desizaun Konsellu Ministru nian mós aprova 29 outubru nu’udar loron nasionál ba profesór sira.

(Jornalista: Rafy Belo)

(Editór : Manuel Pinto)

 

HUSIK IDA HATÁN