AIFAESA Prodús ona Reseita Rihun U$27.000 ba Kofre Estadu

0
47
Foto/AIFAESA.

DILI (TATOLI)-Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), prodús ona reseita ba kofre Estadu liuhusi pagamentu koima hamutuk rihun U$27.000 ne’ebé dezde fulan-Fevereiru 2017 hala’o nia knaar ba inspesaun nian.

Koodenadór AIFAESA, Abílio Oliveira Sereno iha nia diskursu ba selebrasaun aniversáriu AIFAESA ba dahuluk informa, inspesaun sira ne’e hala’o iha Autoridade Munisipál Dili, Baukau, Munisípiu Bobonaru, Kovalima ba estabelesimentu hamutuk 696,  hodi identifika 282 infrasaun no halo apreensaun ba produtu irregulár sira ho totál 23.553 unidade.

“Ho nune’e prosesu instauradu iha Departamentu ba Asuntu Jurídiku no Kontraordenasaun hamutuk 232 no halo ona mós destruisaun ba produtu apreendidu sira ho totál 12.717 unidade iha fulan-Juñu ho servisu hamutuk ho PNTL no autoridade munisipál no operadór ekonómiku balun,” Abílio hato’o iha selebrasaun loron AIFAESA nian ho tema “Oinsá proteje konsumidór sira no saúde públika no promove konkorénsia leál entre operadór ekonómiku sira” iha salaun Ministériu Solidariedade Sosiál, ohin.

AIFAESA tuir dekretu lei númeru 26/2016, loron 29 Juñu, hamriik hanesan autoridade inspetiva ida ne’ebé ho kompeténsia luan tebes hodi inspesiona no fiskaliza ezersísiu atividade ekonómika sira hotu iha setór ai-han no la’ós ai-han, iha área metrolojia no padronizasaun hodi kobre to’o territóriu Timor-Leste tomak , inkluzivamente zona fronteiriza sira, aeroportu no portu.

Abílio dehan serbisu lubun boot ne’ebé AIFAESA halo ona no balun planeadu atu implementa maibé AIFAESA sei enfrenta dezafiu ne’ebe konsidera signifikante tebes atu tau matan no rezolve ida ne’e hanesan formasaun kontínua ba tékniku laboratóriu no inspetór sira, hadi’a jestaun informátika no komunikasaun hodi promove divulgasaun no informasaun ba públiku, hametin kooperasaun ho instituisaun nasionál no internasionál,  intensifika asaun preventiva no represaun iha munisípiu hotu-hotu, halo análize kona-ba risku ai-han no disemina rezultadu ba populasaun no instalasaun laboratóriu seguransa alimentár sai hanesan prioridade prinsipál ne’ebé iha AIFAESA nia kaba’as.

“AIFAESA konsiente katak opiniaun barak mai husi públiku katak autoridade ne’e sei sai hanesan pasu importante ida ne’ebé governasaun ida ne’e halo hodi neutraliza problema merkadu ne’ebé refleta liu ba kontrolu kualidade jéneru alimentár no la’ós alimentár, maibé durante hala’o serbisu ida ne’e, AIFAESA liuhusi nia inspetór sira mós ameasadu ho risku atu monu ba prátika kriminál sira ne’ebé afeta tebes ba sosiedade Timor-Leste iha aspetu protesaun konsumidór”.

Aleinde ne’e mosu perpestiva diferente ne’ebé hatete AIFAESA mosu atu sai hanesan entidade ne’ebé satan netik dezenvolvimentuemprezariál Timór nian. “ Maibé ha’u fiar katak ho atividade sosializasaun ne’ebé realiza ona husi AIFAESA hodi ko’alia no aprezenta ba operadór ekonómiku kona-ba AIFAESA rasik, natoon ona atu justifika katak prezensa AIFAESA , aleinde sai hanesan autoridade ne’ebé inspesiona no fiskaliza atividade ekonómika sira, maibé sai mós hanesan autoridade ne’ebé aposta másima iha prevensaun ba prátika irregularidade sira, ho kontrolu ne’ebé implementa, fiar sei garante irregularidade ne’ebé iha, sei latransforma to’o krime”.

(Jornalista : Maria Auxiliadora, Editor : Manuel Pinto)

 

HUSIK IDA HATÁN