DILI (TATOLI)-Primeiru Ministru (PM) Rui Maria de Araújo ohin, Segunda (12/06) iha Palasio Governu realiza enkontru ho Governador Banku Sentrál Abrão Vasconselos hodi diskuite kona-bá sistema pagamentu nasionál ho sistema kréditu iha banku komersial sira.
Governador Banku Sentrál Abrão Vasconselos hafoin inkontru esplika, sorumutu ne’e relasiona ho dekretu lei ne’ebé Konsellu Ministru (KM) aprova, foin lalais ne’e hodi fó hanoin ba malu atu iha jestaun ba implementasaun la bele mosu risku.
“Ohin ami husu para atu haree jestaun ida nee para labele mosu risku nesesaria durante implementasaun,” Abrão Vasconselos, informa ba jornalista sira, iha Palasio do Governu, ohin.
Diskusaun ne’ebé mosu entre lider nain rua ne’e konsentra liu ba iha sistema garantia kréditu hodi fasilita finasiamentu ba emprezariu nasionál. No sistema dezenvolvimentu pagamentu nasionál ne’ebé integra sistema governu no sistema kréditu iha banku komersial sira.
“Banku sentral hanesan instituisaun ne’ebé jere no implementa sistema ida ne’e atu fasilita governu no banku sentral sira atu fó kréditu,” Abrão Vasconselos reforsa tan.
Antes ne’e iha aprovasaun Orsamentu Jerál Estadu (OJE) 2017 parlamentu nasionál aprova dolar Amerikanu milloens 4 atu fasilita kréditu ba emprezariu sira, basa estadu no nasaun haree finansiamentu empreza sira sei menus.
(Jornalista: Agapito dos Santos)// (Editór : Manuel Pinto)