iklan

NASIONÁL, EKONOMIA, DILI, MUNISÍPIU

Inkubadora MAP Iha Fini Ikan hamutuk 441.185

Inkubadora MAP Iha Fini Ikan hamutuk 441.185

Xefe Departamentu Produsaun Fini, Ministériu Agrikultura (MAP), Adrianu Dani (liman karuk). Foto facebook.

DILI (TATOLI)-Dadus nasionál produsaun fini ikan husi sentru inkubadora (hatchery), Gleno, Same, Loihunu no Mugis iha tinan 2016 hamutuk 441.185, informa Xefe Departamentu Produsaun Fini, Ministériu Agrikultura (MAP), Adrianu Dani ba TATOLI iha Komoro, ohin.

Sentru produsaun ikan ne’ebé MAP estabelese iha Gleno-Ermera, Loihunu-Vikeke, Same-Manufahi, Vemase-Baukau no Maubise-Maliana tuir dadus nasionál husi tinan 2011 produsaun ikan hamutuk, 18.000, no tuirmai iha 2012 sa’e ba 39.430.

Iha tinan 2013 fini ikan tun ba 25.960 maibé tinan tuirmai sa’e fali ba 46.548 to’o mai iha 2015 sa’e ba 59.240  no iha tinan 2016 produsaun ikan sa’e maka’as ba númeru ne’ebé aas liu tinan hirak nia laran.

“Sentru haat iha Maliana, Vikeke no Manufahi, no Gleno ne’e mak prodús fini bee-midar nian no Baukau mak ba mariña nian”, Adrianu dehan.

fini ikan ne’e iha tinan-tinan suporta ba grupu sira ne’ebé estabelese tiha ona sira-nia kolam ne’ebé depende ba nesesidade ikan no medida kolam nian.

“Ikan nila, emas, no lele. Ikan nila ne’e prodús iha tempu ukun-an tanba ikan ne’e fasil liu prodús nia oan no fahe ba grupu sira ne’e, fasil atu haki’ak kompara ho lele no emas. Ita iha nila metan, mean, maibé ikan emas produsaun komesa menus ona tanba domina ona ho nila no ikan lele,” Adrianu haktuir.

Fini ikan sira ne’e aleinde fo grupo sira ne’ebe estabelisidu ona, MAP mós harii grupu sira iha munisípiu hotu ne’ebé hetan asisténsia husi tékniku MAP nian nomós parseiru dezevolvimentu sira hanesan World Fish ne’ebé ajuda dezde tinan tolu ona, Mercy Corps ne’ebé tulun komunidade iha tinan rua ba kotuk no Giz ne’ebé ajuda grupu sira atu ke’e kolam para Governu no sira suporta fini oan ba grupu sira nomós Organizasaun Lokál balun.

(Jornalista : Maria Auxiliadora)

(Editór : Manuel Pinto)

iklan
iklan

Leave a Reply

iklan
error: Content is protected !!