Xefe Governu Husu Labele Fiar Informasaun Falsu

0
114
Foto GPM

DILI, (TATOLI) – Tanba Konsellu Veteranu seidauk eziste, Primeiru Ministru husu ba populasaun atu labele fiar informasaun ne’ebé grupu balun lansa iha komunidade nia leet. 

“Se karik ema sira ne’e lori Konsellu Kombatentes Libertasaun Nasionál  nia naran atu forma buat ruma no lohi ema hodi hetan buat ruma ne’e tama iha krime ida bolu naran burla. Ema ne’ebé sente prejudikadu ho ema sira ne’e mak tenke hato’o keixa ba polisia”, Xefe Governu, Rui Maria de Araújo ba jornalista sira iha Palásiu Governu, ohin.

Nia hatutan: “Ha’u husu ba populasaun no publiku tomak labele fiar informasaun ne’ebé ema lori ba imi nia leet, hatete agora atu forma ona Konsellu Kombatente Libertasaun Nasionál, ida ne’e la-lood. Dala ida tan husu ba povu tomak, agora tama ona ba iha tempu kampaña ema hakarak lori kestaun ida kombatente veteranu nian ba lohi atu manan votu”.

Governu antes ne’e haruka dekretu lei atu  estabelese konsellu ne’e ba eis Prezidente Repúblika, Taur Matan Ruak maibé la-promulga hodi veta, tanba ne’e governu sei reve fila fali molok haruka ba prezidente atuál, Francisco Guterres Lú-Olo hodi promulga.

“Prosesu ne’e agora governu konsulta ona ho  Prezidente Republika foun, Francisco Guterres Lú-Olo, Governu agora hare fila-fali oinsá atu aprova fali estatutu ba Konsellu Kombatente Libertasaun Nasional  molok haruka atu promulga”, tenik.

Konsellu seidauk forma ho baze legál tanba ne’e atividade sosializasaun iha terenu ne’e konsidera illegál.

Iha fatin seluk, Prezidente Asosiasaun Konsellu Kombatentes Libertasaun Nasional, David Dias Ximenes lamenta ho atividade grupu illegál ne’ebé uza naran veteranu hodi hala’o atividade refere.

“Ema sira ne’ebé mak agora dadauk halo buat ida ne’e iha terenu ne’e ita konsidera ilegál”,  haktuir.

Jornalista: Agapito dos Santos

Editora: Rita Almeida

HUSIK IDA HATÁN