Xanana: Jerasaun Foun Tenke Halakon Ego

0
1135
Kay Rala Xanana Gusmão. Foto espesiál

DILI, (TATOLI)—Eis-gerilleiru Kay Rala Xanana Gusmão apela ba jerasaun foun sira atu halakon ego no individualizmu. Buka malu ba, halibur malu ba hodi Partisipa iha dezenvolvimentu.

“Hanesan jerasaun tuan, ami husu boot tebes ba jerasaun foun ohin, halakon oituan imi-nia individualizmu, imi-nia ego,” eis-lider rezisténsia ne’e apela ba jerasaun foun sira iha serimónia inagurasaun momentu Proklamadór Francisco Xavier, iha rotunda, Merkadu antiga, Sabádu (20/05).

“Jerasaun foun sira, halibur malu ba, halibur hamutuk hanoin ida de’it atu dezenvolve, halibur hamutuk esforsu ida de’it atu hadi’a ita-nia rain no ita-nia povu.“Ne’e mak ami husu,” lider karismatiku ne’e husu.

Hodi kontinua haklaken, ami (jerasaun tuan) loron ida sei la iha tuir ba destiñu Maromak nian, maibé antes la iha hosi mundu ne’e, ami hakarak haree jerasaun foun agora atu halo saida.

Tuir Xanana jerasaun foun ohin loron matenek liu, se halo komparasaun ho jerasaun tuan sira, maibé matenek de’it se la to’o bainhira iha ego, tanba ne’e nia (Xanana) husu halakon tiha ego, halakon hanoin individuál, halibur malu ba hodi bele haree ba dalan di’ak liu atu nune’e hadi’a ita nia rain, hametin unidade, hadi’a ita nia nasaun, hanesan uluk funu buka halibur malu, fó vida, ho hanoin ida de’it atu liberta nasaun.

“Ohin, iha ukun aan nia laran depois quinze anos ita mós sei buka atu hamutuk nafatin, hanoin ida de’it, esforsu ida de’it hodi ita-nia rain bele la’o, hodi ita-nia oan sira ikus mai bele hateten katak sira (jerasaun tuan) mós halo,” Maun Boot konklui.

(Jornalista: Rafy Belo)

(Editór : Manuel Pinto)

HUSIK IDA HATÁN