UNTL Deskobre Makina Alternativa Oleo Pezadu

0
230
Dadus pré-limináriu. Foto Tatoli: Rafy Belo

DILI, (TATOLI)-Universidade Nacional Timor Lorosa’e (UNTL) liuhusi Fakuldade Enjeñaria, Siénsia no Teknolojia (FEST) deskobre teknolojia foun ka makina ho naran “Portable Turbina Cross Flow”.

Makina portable ne’e sei sai nu’udar solusaun no alternativa ida ba oleo pezadu no enerjia husi “Power Plant” tanba sei uza de’it enerjia bee nian.

“Nia funsaun boot maibé nia kustu ki’ik,” informa Koordenadór peskiza, Junior Raimundo da Cruz iha Auditóriu, UNTL, Segunda (29/05).

Oras ne’e dadaun ekipa peskizadór ne’ebé kompostu ema na’in hitu ne’e sei halo hela estudu pré-limináriu ida molok halo lansamentu.

Tempu ba lansamentu, tuir kalendáriu ne’ebé koordenadór ne’e aprezenta katak sei halo lansamentu iha dezembru tinan ne’e. Tempu hahú peskiza ne’e hala’o iha abril, fulan ida kotuk.

Orsamentu ba peskiza ne’e mai husi CNIC (Centro Nacional da Investigação Ciêntifica), UNTL ho montante dolár 729 (atus hitu rua nolu resin sia).

Entretantu, esperimentasaun no analiza ne’ebé UNTL, FEAST liuhusi nia peskizadór sira sei halo, Koordenadór Peskiza, Junior Raimundo da Cruz sei iha aspetu lima ne’ebé sira sei dezenvolve tan.

Aspetu hirak ne’e mak hanesan identifika no kompara forsa mínimu husi kaskata (air terjun-bahasa), identifika optimum water flow rate (bee sulin), modifika no kompara lala’ok makina nian ho tipu turbina seluk.

Tuir mai, kompara efisiénsia Delta no konekasaun “star” ba konverte induksaun motor ba jeradór inklui halo analiza no kompara ba transistor ne’ebé sei uza ba makina “Portable Turbina Cross Flow”.

Makina “Portable Turbina Cross Flow” hafoin lansamentu sira sei aprezenta ba governu hodi bele konsidera atu nune’e sai mós alternativa ida.

Basa “Power Plant” Hera no Betanu ne’ebé agora ne’e Timor-Leste iha, iha tempu ruma bainhira hahú tuan mak sei hamosu kustu ida ne’ebé boot ba nia manutensaun no nia operasionalizasaun.

Ho razaun ida ne’e, sira halo dezeñu no analiza makina “Portable Turbina Cross Flow” hodi bele sujere sai meius alternativa ida iha futuru no makina ne’e rasik “amigavel” ho natureza.

(Jornalista: Rafy Belo)

(Editór : Manuel Pinto)

 

HUSIK IDA HATÁN