Tribunál Rekursu Distribui Ona Formulàriu ba ParPol

0
100
Prezidente Tribunál Rekursu foun, Deolindo dos Santos bainhira halo intervista ho jornalista sira iha Palásiu Prezidensiál. Foto Tatoli/Antonio Goncalves

DILI, (TATOLI) – Prezidente Tribunál Rekursu, Deolindo dos Santos hateten ninia parte disribui ona formulàriu ba Partidu Polìtiku (ParPol) hamutuk 31 hodi prense nune’e bele partisipa eleisaun parlamentár iha loron 22 jullu 2017.

“Ami nia ekipa fahe ona formulàriu ba partidu polìtiku sira iha sàbadu no domingu liuba (13 to’o 14) maiu hafoin dekretu lei ne’e aprova iha sesta (12/5)”, informa nia ba Tatoli iha Palàsiu Prezidensiál Bairopite Dili, kuarta (17/5).

Nia esklarese ParPol sira sei hatama hikas formulàriu to’o loron 1 fulan juñu 2017. “Prosesu distribuisaun formulàriu la’o ona tanba ne’e sira sei hatama to’o loron 1 fulan juñu”, hatutan.

Ninia parte mos preparadu atu simu lista kandidatura husi ParPol. “Ekipa atu simu lista kandidatura ne’e ha’u rasik  maka lidera tanba ne’e partidu polìtiku sira bele hatama lista iha kualker momentu”, tenik.

Jornalista: Agapito dos Santos

Editora: Rita Almeida

HUSIK IDA HATÁN