Tour de Timor 2017 Lansa Parseria Ofisiál ho Fundasaun eMerge

0
78
Imajen entre Embaixadór Timor-Leste ba Austrália, Abel Guterres (karuk), Xefi Fundasaun eMerge, Ian MacRitchie (klaran) no José Ramos Horta (liman loos)iha Austrália. Imajen Gabinete Tour de Timor.

DILI, (TATOLI) – Fundasaun eMerge iha Sidney, Austrália hahú ninia parseiru ofisiál ho Tour de Timor atu bele lori ema hosi mundu mai hamutuk iha dame no kria relasaun foun ho Timor.

Bainhira sai oradór prinsipál iha eventu Gala hosi Fundasaun eMerge ne’ebé hala’o iha Sydney, foin lalais ne’e, eis Prezidente no Laureadu Nobel ba Pás, José Ramos Horta informa Fundasaun eMerge iha kompromisu atu hadi’a edukasaun, tratamentu saúde no oportunidade desportu ba foinsa’e timoroan sira.

Tuir informasaun ne’ebé TATOLI simu hosi Gabinete Tour de Timor 2017 segunda ne’e katak relasaun entre Fundasaun refere ho Timor-Leste la’o kle’ur ona.

“Ita sei hetan partisipante atus ba atus hosi Austrália hodi partisipa iha korida ida ne’e iha fulan setembru hanesan siklista, voluntáriu no doutór sira. Ha’u hakarak apela ba ita-boot sira atu suporta fundu ba ema sira ne’e no apoia sira nia esforsu ba angariasaun fundus ho nune’e hamutuk ita bele demonstra forsa ne’ebé ita hotu iha hodi halo buat foun ida ba ema sira ne’ebé sei halerik tanba terus no kiak nia vida moris”, tenik Horta.

Tour de Timor 2017 sei hala’o durante loron lima nia laran entre loron 19 to’o loron 23 setembru tinan ida ne’e.

Dalan ba kompetisaun ne’e sei liuhusi kilómetru 500 no sa’e foho kuaze metru 11.000 ne’ebé sei sai hanesan korida bisikleta foho (MTB), nakonu ho dezafiu iha mundu tomak.

Jornalista: Xisto Freitas

Editora: Rita Almeida

HUSIK IDA HATÁN