TL no Korea Realiza Konsertu Muzikál

0
50
Grupu Taekwondo hosi Korea hatudu sira nia arte iha konsertu muzikál. Imajen Ajénsia TATOLI/Xisto Freitas

DILI (TATOLI)—Governu Timor-Leste (TL) liuhusi Ministériu Turizmu, Arte no Kultura no Embaixada Korea ba Timor-Leste, realiza konsertu muzikál iha Sentru Konvensaun Dili (CCD), Domingu (14/5) tuku 19:00, ho objetivu atu haburas kooperasaun bilaterál entre nasaun rua.

“Objetivu atu haburas liu-tan kooperasaun di’ak entre TL no Korea no atu promove turizmu, kultura no arte Timor ba koreanu sira nomós timoroan bele kuñese liu-tan arte no kultura hosi koreanu sira”, Sekretária Estadu Arte no Kultura, Maria Isabel de Jesus dehan kestaun ne’e iha nia diskursu.

Asisti nain sira ba konsertu muzikál. Imajen Ajénsia TATOLI/Xisto Freitas

Nia haktuir konsertu muzikál entre Korea no Timor-Leste sai hanesan eventu anuál no ida ne’e hala’o ba datoluk ona.

Nia tenik, konsertu ida ne’e mós atu selebra kooperasaun bilaterál entre rai rua ba dala 15.

Lori Ministériu Turizmu Turizmu, Arte no Kultura nia naran, Maria Isabel agradese ba Governu Korea ba kooperasaun di’ak ida ne’e, kooperasaun ida ne’ebé maka hatutan forsa governu TL nian atu dezenvolve liu-tan setór turizmu, arte no kultura.

Hola parte iha konsertu muzikál ne’e maka artista no banda múzika múzika sira hosi Korea maka hanesan Ladies Code, Heejun Han, B-Boy Team SNRD no artista nasionál maka hanesan Gerson Oliveira no Cidalia.

Aleinde ne’e, hola parte mós atrasaun grupu Taekwondo hosi Korea, grupu dansa arte no kultura hosi Korea no Timor-Leste.

Partisipa iha seremónia ne’e maka hanesan Ministru Koordenadór assuntu Adminisitrasaun Estadu no Ministru Justisa, Dionísio Babo, Adjuntu Komandante Polísia Munisípiu Dili, Euclides Belo, Embaixadór Korea ba TL, Kim Ki Nam, entidade importante sira seluk, koreanu sira no timoroan sira rihun resin. 

Jornalista: Xisto Freitas

Editora: Rita Almeida

 

HUSIK IDA HATÁN