TL-Korea Sul Sei Organiza Friendship Week 2017

0
115
Konferénsia imprensa konaba atividade Friendship Week 2017 datoluk iha Sentru Konvensaun Dili, sesta (5/5). Foto Tatoli/Julia Chatarina

DILI, (TATOLI) – Governu liuhosi Ministériu Turizmu, Arte no Kultura (MTAK) hamutuk ho Embaixada Korea iha Timor-Leste sei organiza eventu Korea and Timor-Leste Friendship Week ba datoluk.

“Tinan ida ne’e ba datoluk Timor-Leste ho Korea Sul koopera iha área kulturál kada tinan iha fulan maiu to’o juñu, tinan ne’e ami hili loron 15 atu halo Friendship Week”, informa Ministru Turizmu Arte no Kultura, Francisco Kalbuady Lay liuhosi konferénsia imprensa iha Sentru Konvensaun Dili, sesta, (5/5).

Eventu ne’e sei iha aprezentasaun husi artista Korea hanesan B-Boy SNRD, Ladies Code no artista solo Han Haenjung hamutuk ho ekipa profesionál Taekwondo ne’ebé mak sei kolabora mós ho artista Cidália, Gerson, Danecra Band, DIT Singer no ekipa Taekwondo Timor-Leste.

Ekipa artista no Taekwondo hirak ne’e sei to’o iha Díli iha sábadu loron 13 fulan-maiu 2017. Konsertu durante oras rua nia laran ne’e sei hala’o iha domingu, 14 maiu 2017 iha Sentru Konvensaun Dili, tuku 18.30, gratuitu ba públiku.

Iha fatin hanesan, Embaixadór Korea iha Timor-Leste, Kim Ki-Nam hatutan konsertu ne’e nu’udar eventu kulturál atu promove amizade.

“Eventu ida ne’e signifikante tebes tanba marka tinan restaurasaun independénsia no relasaun diplomátiku entre nasaun rua”.

Akresenta tan, Timor-Leste sei simu prezidente foun, Francisco Guterres Lú-Olo. Kongratula eventu importante hirak ne’e no fahe k’solok hamutuk ho Timoroan tomak, embaixadór Korea konvida ona kantadór husi Korea atu mai partisipa.

“Korea no Timor-Leste mantein nafatin parseria iha fatin barak nia laran liuhosi Korea nia partisipasaun iha Forsa Pás ONU, kooprerasaun dezenvolvimentu liuhosi ajénsia KOIKA no traballadores Timoroan hamutuk 2.000 ne’ebé agora dadauk servisu iha Korea”, katak Kim Ki-Nam.

Eventu ne’e atu anima komunidade relasiona ho komemorasaun loron restaurasaun Independénsia Timor-Leste ba dala XV, nomós komemorasaun tinan 15 relasaun diplomasia. Alende ne’e hala’o interkambiu kulturál hodi hametin relasaun iha futuru.

Eventu ne’e sei hetan apóiu husi PNTL, Ministériu Saúde (MS), Imigrasaun, Aviasaun Sivíl nomós Taekwondo Timor-Leste. Alende ne’e, sei transmite husi Rádiu no Televizaun Timor-Leste (RTTL).

Jornalista: Julia Chatarina

Editora: Rita Almeida

HUSIK IDA HATÁN