TL-Austrália Asina Akordu Aériu

0
416
Ministru Negosiu Estranjeiru no Koperasaun, Hernani Coelho. Foto Tatoli/Julia Chatarina

DILI, (TATOLI) – Governu Timor-Leste (TL) no Governu Austrália, ohin asina akordu iha área transporte aériu (Air Service Agreement) iha sala VIP MNEK, atu kompañia privadu sira iha posibilidade estabelese vou regulár entre TL ho Austrália.

“Asinatura akordu ne’e iha posibilidade ba kompañia privadu sira hodi estabelese vou regulares entre Timor-Leste ho Austrália. Previléjiu ita fó ba kompañia sira husi TL no Austália, maibé iha akordu ne’e mós mensiona kompañia parseiru ne’ebé Austrália no TL sira uza”, tenik Ministru Negósiu Estranjeiru no Kooperasaun (MNEK), Hernani Coelho ba jornalista sira iha salaun VIP MNEK hafoin asina akordu aériu.

Nia haktuir TL servisu kleur ona ho Austália hahú desde tinan lma liuba iha sestu governu nia mandatu konsege tur hamutuk ho embaixadór hodi finaliza dokumentu importante ne’e.

Hodi realsa, akordu aériu ne’e importante tanba fó dalan ba kompañia aériu sira bele hadia, hamosu, haburas liutan, méius transporte aériu entre nasaun rua ne’e atu habadak distansia, nomós bele hatun presu ne’ebé razoavél ne’ebé ema iha kapasidade atu sosa billete, atu nune’e bele aumenta frekuensia ho númeru viajen entre rai rua.

Nia dehan tan, TL no Austália rai ne’ebé mak belun iha tempu uluk kedan iha relasaun di’ak, turizta hosi Austália husi labarik kiik to’o katuas-ferik, nivel distribuisaun ne’e oin seluk ho nasaun seluk tanba iha interesse passadu istória komun no passadu resente ne’ebé mak iha interesse ho ema husi nasaun rua ne’e.

Governante ne’e espera Autralianu sira barak mak sei mai vízita TL no timoroan barak mak vízita Austália tanba tuir nia, timoroan iha mundu, iha nasaun Austrália mak barak liu hamutuk 30.000 timoroan.

“Ho presu ne’ebé mak baratu, ha’u fiar katak viajen entre Timor ho Austrália sei maka’as, Austrália ho nia forsa sira mai Timor desde 1999 to’o 2012 antes ita hakotu ONU nia mandatu iha Timor, iha Australianu nain 15.000 resin mak iha Timor”.

Nia informa, akordu ne’e sei lori ba Parlamentu Nasionál (PN) atu hetan ratifikasaun, prosesu dadauk ona. Tuir mai, auroridade ne’ebé mak responsável iha área nian, sei asina akordu ne’ebé sei determina, frekuensia vou, loron vou hodi halo implementasaun. Laiha durasaun tempu ba akordu ne’e, mas sekuandu iha nesesidade atu halo revisaun, bele halo revisaun.

Iha fatin hanesan, embaixadór Austrália iha TL, Peter Doyle ba jornalista sira hateten, akordu ne’e di’ak, kontente ho akordu ida ne’e. Agora Australianu no Timoroan sira bele hametin ligasaun iha área komérsiu, turizmu no seluk tan.

Akordu ne’e asina husi parte TL reprezenta MNEK, Hernani Coelho no parte Austrália reprezenta Embaixadór Austrália iha TL, Peter Doyle.

Jornalista: Julia Chatarina

Editora: Rita Almeida

HUSIK IDA HATÁN