Tinan 15 Hanesan Mane Klosan Ida

0
149
Ministru Estadu, Koordenadór Asuntu Adminsitrasaun Estadu no Ministru Administrasaun Estatál, Dionísio Babo Soares iha abertura espozisaun nasionál 20 Maiu 2017 iha Sentru Konvensaun Dili. Foto/Egas Cristovão.

DILI, (TATOLI) – Ministru Estadu, Koordenadór Asuntu Adminsitrasaun Estadu no Ministru Administrasaun Estatál, Dionísio Babo Soares iha abertura espozisaun nasionál 20 maiu 2017 hatete komemorasaun loron restaurasaun independénsia, Timor-Leste ho tinan 15 nu’udar mane klosan ida.

Ministru Estadu, Koordenadór Asuntu Adminsitrasaun Estadu no Ministru Administrasaun Estatál, Dionísio Babo Soares no Ministru Komérsiu, Indústria no Ambiente, Constâncio Pinto iha abertura espozisaun nasionál 20 Maiu 2017. Foto/Egas Cristovão.

Timor-Leste foinsa’e, foin buras no foin nakloke nia funan ho tahan maibé hanesan nasaun orgullu tanba iha líder istóriku sira ne’ebé di’ak tebes, asua’in ne’ebé fó sira-nia raan ho ruin ba rai ida ne’e hodi ohin loron bele moris sai país ida ne’ebé dignu, ne’ebé iha mós autoridade iha papél importante atu dezempeña, la’ós iha nivel rejionál de’it maibé Nasaun tomak.

“Iha komemorasaun hanesan ne’e, ha’u agreadese tebes ba ministru MCIA ho nia komponente tomak ne’ebé konsege bolu maluk hotu husi ministériu, sosiedade sivíl atubele aprezenta espozisaun ki’ikoan ida hodi hatudu produtu saida mak Governu ou komponente seluk bele oferese iha 15 anos ita-nia ezisténsia hanesan país iha ita-nia rai”, Ministru katak iha Sentru Konvensaun Dili, horisehik.

Hanesan prezidente komisaun organizadora ba eventu nasionál, husu ba timoroan tomak ne’ebé hela iha Dili, sei iha oportunidade atu vizita feira tanba saida mak país bele prodús, oferese no insentiva di’ak liután atu lori Nasaun ne’e sai forte liu iha futuru.

“Parabéns ba ita hotu iha tinan ida ne’e mós, sei halo pasajen Prezidénsia da Repúblika husi Prezidente Taur Matan Ruak ne’ebé sai ita-nia aman durante tinan lima nia laran oferese buat barak ba ita-nia rai hodi kria estabilidade, pás, dezenvolvimentu no unidade nasionál”.

“Ita mós reza ba Na’i Maromak para tulun ita-nia prezidente foun, prezidente Lú-Olo ne’ebé ita hotu hili atu sai aman ba tinan lima mai hodi bele sai aman ne’ebé di’ak liu, aman ne’ebe bele haree nia oan hotu-hotu no país ida ne’e atu ita bele forte nafatin, moris hanesan país ida ne’ebé ho orgullu no bele dezempeña ita-nia papél hanesan mós membru nasaun unida”.

Parabéns ba populasaun Timór tomak ba festeza tinan 15 restaurasaun independénsia Repúblika Demokrátika Timor-Leste nian.

Jornalista: Maria Auxiliadora

Editora: Rita Almeida

HUSIK IDA HATÁN