Timoroan Solidariza Ahok

0
134
Asaun sunu lilin no reza hodi defende lia loos iha Kristu Rei, Kinta kalan.

DILI, (TATOLI) – Timoroan besik rihun ida hamutuk ho sidadaun Indonézia sira ne’ebé hela iha Timor manifesta solidariedade ba atuál Governadór Kapitál Jakarta Indonézia, Basuki Tjahaja Purnama Ahok ne’ebé hetan kondenasaun tinan rua tanba deskonfia halo difamasaun ba relijiaun musulmanu.

Asaun solidariedade ne’e liuhusi sunu lilin no reza iha Kristu Rei, Areia Branca, Dili, tuku 20:00 to´o tuku 22:00.

Asaun refere la’ós partisipa de’it hosi sira ne’ebé relijiaun katólika no protestante maibé musulmanu lubuk ida.

Responsável ba asaun ne’e, Cristopher Samara hateten maske problema ne’e akontese iha Indonézia maibé buat ida lia loos ne’e hotu-hotu tenke fó apoiu.

“Ahok fó inspirasaun ba ema hotu inklui timoroan sira. Ikus-ikus ne’e lia loos sempre lakon no parte sira ne´ebé iha rekursu maka sempre manán. Ami mai iha ne’e tanba ho konsiénsia rasik katak buat ida lia loos ne’e hotu-hotu tenke apoiu”, dehan ba TATOLI iha Kristu Rei, kinta kalan.

Cristopher rejeita asaun ne’ebé sira halo tanba haree Ahok hanesan ema relijiaun kristaun, maibé objetivu prinsipál maka defende lia loos.

Eventu espontania ne’e partisipa mós hosi artista múzika timoroan sira maka hanesan Abio Salsinha, Quito Belo, Quito Martins no Prezidenti Associação Nacional de Músicas de Timor-Leste (ALMAMOR), Henrique do Rosario “Waiwatu”.

“Ami simu konvite informál hodi partisipa iha asaun ne’e tanba haree katak Ahok luta ba injustisa ne’ebé la’o iha Indonézia. Ne’e duni, ami hakarak fó ami nia solidariedade”, haklaken.

Tuir nia, Ahok la’ós luta ba dezenvolvimentu de’it maibé mós luta ba área múzika no sira seluk. Ne’e duni, nia tenik, motiva sira hodi fó apresiasaun ba Ahok hanesan artista Indonézia halo dadauk iha Indonézia.

“Kuaze mundu artista iha ne’ebé de’it ita sempre dada malu besik. Tanba ne’e, kualker atividade ne’ebé artista mundu seluk halo hodi luta kontra injustisa, sosiedade artista Timor sempre suporta”, tenik.

Prezidenti ALMAMOR hatete maske Timor-Leste no Indonézia nasaun ket-ketak ona maibé relasaun amizade la kotu. Tanba ne’e, asaun ne’e bele hametin liu-tan amizade nasaun rua.

Atividade sunu lilin no reza hodi defende lia loos sei kontinua ohin no ba nafatin. Orsida kalan, movimentu ativista pro lia loos sei hala’o atividade ne’e iha Dili, sei involve ema barak liu-tan.

Jornalista: Xisto Freitas

Editora: Rita Almeida

HUSIK IDA HATÁN