Timor-Leste Sei Menus Indústria

0
92
Vise-Ministru Obra Públika, Transporte no Telekomunikasaun II, Inácio Freitas Morreira. Foto/António Gonçalves.

DILI, (TATOLI) – Objetivu Dezenvolvimentu Sustentavel (ODS) númeru sia kona-ba indústria, inovasaun no infraestrutura ne’ebé ratifika liuhusi rezolusaun Parlamentu Nasionál maibé defaktu indústria iha Timor-Leste sei menus tebes.

Maibé lataka dalan ba Nasaun ne’e atu harii infraestrutura sira ne’ebé reziliente, promove industrializasaun inkluziva no sustentavel, no enkoraja inovasaun.

Vise-Ministru Obra Públika, Transporte no Telekomunikasaun II, Inácio Freitas Morreira hatete Nasaun iha termu kapasidade intelektuál natoon maibé presiza atu halo esforsu tan atubele kontribui hodi fó hanoin para dezenvolve no halo buat foun ruma ba indústria no inovasaun.

“Ha’u bele hatete kuaze laiha maibé lataka dalan tanba ne’e meiu ida atu fó sustentabilidade ba vida Nasaun nian. Hakarak ka lakohi ita bele husu setór sira ne’ebé halo produsaun hanesan maibé bele mós halo iha Timor-Leste atu nune’e bele iha reseita ruma atu sustenta nasaun”, hatete iha Otél Novu Turizmu foin lalais ne’e.

Iha parte seluk, infraestrutura ne’ebé presiza kompleta mak hadi’a kondisaun infarestrutura di’ak ba aeroportu no portu atu ekonomia bele sa’e no dulas di’ak liután.

“Portu Tibar lakleur hahú ona no ha’u bele dehan multi funsaun no sei konsidera portu ne’e hanesan portu tránzitu no ha’u hein katak kuandu hotu ona sei halo operasaun ne’ebé ita hotu hakarak, nesesita no halo reseita barak ba ita-nia nasaun”.

Daudaun ne’e sei halo hela konstrusaun ba aeroportu ne’ebé besik atu hotu, hanesan iha Suai kuaze porsentu 90 no fatin ne’e nu’udar kondisaun ne’ebé tenke prepara ba esplorasaun petróleo tanba Timor-Leste Nasaun ne’ebé riku ho mina-rai no tenke kria kondisaun.

Nune’e supply base ne’ebé hahú husi V no VI Governu Konstitusionál halo hela prosesu aprovizionamentu ne’ebé daudaun ne’e kontratu sei iha hela Tribunál Rekursu no hein katak bele aprova lalais atu nune’e konstrusaun bele hahú .

“Ha’u garante no hein katak ita-nia mina sira ne’e sei halo esplorasaun ho efisiente no efikásia nune’e bele iha ona reseita ne’ebé di’ak liu ba nasaun”.

Aleinde ne’e, infraestrutura bázika ne’ebé konsege halo ona no sente rezultadu mak enerjia elétrika, atinje ona porsentu 80.

Jornalista: Maria Auxiliadora

Editora: Rita Almeida

HUSIK IDA HATÁN