Timor-Leste Kompromete Implementa ODS

0
124
Prezidente Repúblika, Francisco Guterres Lú-Olo iha abertura konferénsia Dezenvolvimentu Sustentavel (ODS) ne'ebé hala'o iha Sentru Konvensaun Dili. Foto António Goncalves

DILI, (TATOLI) – Prezidente Repúblika, Francisco Guterres Lú-Olo iha abertura konferénsia Dezenvolvimentu Sustentavel (ODS) hatete Timor-Leste nasaun ida husi país barak ne’ebé ratifika ajenda 2030 iha nível parlamentár,  antes aprova husi Nasaun Unida no ida ne’e hatudu kompromisu ba ajenda dezenvolvimentu globál no  implementasaun ODS.

“Ha’u orgullu atu hatete katak Timor-Leste defensór kompremetidu ida ba inkluzaun Objetivu Dezenvolvimentu Sustentavel (ODS) númeru 16 sobre konsolidasaun pás, no konstrusaun Estadu ba ajenda 2030”, dehan Xefe Estadu iha Sentru Konvensaun Dili, ohin.

Suporta Timor-Leste nia iha ajenda ne’e hatudu ona iha esperiénsia rasik katak lahó pás sei laiha dezenvolvimentu no sein dezenvolvimentu sei laiha pás.

“Dalan ne’ebé ita tuir dezde restaurasaun independénsia fó ona mai ita esperiénsia ne’ebé estensiva katak, apezár ser espesífiku ba ita-nia país, estremamente relevante ba nasaun seluk”.

Inspira husi solidariedade ne’ebé hatudu iha mundu ba nasaun ne’e, Timor-Leste fahe ona esperiénsia sira ne’e ba nivel  internasionál no pretende kontinua halo ida ne’e.

“Ami la’ós riku iha termu finanseiru mas riku iha koñesimentu no esperiénsia ne’ebé hakarak kompartilla ho nasaun seluk iha sirkunstánsia hanesan”.

Iha biban ne’e Prezidente Repúblika fó benvindu ba partisipante sira iha konferénsia importante ida ne’e no oferese mellór dejezu ba agradavel hela iha nasaun bonita ida ne’e.

Jornalista: Maria Auxiliadora

Editora: Rita Almeida

HUSIK IDA HATÁN