SLB Kontratu Jogadór Ghana Rua

0
133
Sekretáriu Jerál SLB, Domingos Caiero (liman karuk) no Treinadór SLB, Kim Shin-hwan (imajen daruak hosi liman loos) entrega hela farda SLB ba jogadór Ghana na´in rua. Imajen Mídia LFA

DILI, (TATOLI) – Ekipa Kampiaun Primeira Divisaun Liga Futebol Amadora (LFA) époka 2015/2016, Sporting Laulara e Benfica (SLB) ba dahuluk loke odamatan hodi hala’o kontrata jogadór estranjeiru hosi Ghana.

Sira mak Debrah Michael Kofi ho idade 24 no Boateng Prince Appiah, idade 22, hodi reforsa liutan plantel ekipa refere iha parte meiu kampu no avansadu ba jogu segunda volta époka 2017 ne´ebé tuir oráriu sei hahú juñu oin mai.

“SLB, jogadór maioria hosi akademia, hakarak mantein nafatin ho jogadór lokál, maibé depois sai kampiaun tinan kotuk, ami mós tenke lakon jogadór prinsipál hira ne’ebé maka asina kontratu hodi haforsa klube hanesan Karketu Dili FC, Cacusan, Ponta-Leste no seluk tan”, Sekretáriu Jerál SLB, Domingos Caeiro hafoin asinatura kontratu ho jogadór na’in rua iha edifísiu SLB, kampaun Oficina Veterano Taibessi, sábadu (6/5).

Nia hatutan: “Haree ba kompetisaun iha segunda epoka ne’e kompetetivu tebes, tanba ne’e maka ami mós haka’as án hodi haforsa ekipa ida ne’e”.

Domingos informa desizaun ida ne’e bele realiza tanba hetan aprovasaun hosi Kay-Rala Xanana Gusmão nu’udar Prezidenti SLB. “Hafoin haree ba situasaun iha primeira volta ne’e ami esplika ba ami nia Prezidente Maun-Boot Xanana no nia aprova hodi halo kontratu hafoin rona esplikasaun hosi ami”.

Nia tenik katak buat seluk ida interesante maka jogadór na’in rua ne’e mai la’ós SLB maka bolu, maibé sira rona naran ne’e depois sira mai halo estájiu hamutuk iha kampu demokrasia, nufin sira konsege tama ba ekipa ne’e tanba sira lakohi atu joga iha ekipa seluk.

Durasaun kontratu, Caeiro hateten durante segunda volta époka, maibé ba jogu hanesan Tasa 12 de Novembru no Super Tasa mós prepara.

“Importante maka ami esplika ba sira katak kondisaun klube maka ne’e no klube só selu tuir klube nia kbiit, maibé jestaun klube sei fasilita sira nia alojamentu nomós trata sira nia vistu hela nian durante tinan ida tuir orientasaun Prezidente SLB nian”, esplika.

Biban ne’e, jogadór foun SLB, Boateng Prince Appiah sente ksolok tanba bele haforsa ekipa kampiaun Primeira Divizaun époka 2015/2016 iha segunda volta époka 2017 ne’e.

“Ha’u sente kontente tanba fulan ida ona ami hala’o estájiu no treinu hamutuk iha Kampu Demokrasia, nufin ami hetan fiar hosi treinadór no jestór klube nian atu hamutuk haforsa ekipa ida ne’e iha segunda volta époka 2017”, katak Meiu kampu hosi Nasaun Ghana (22).

Aleinde ne’e, Debrah Michael Kofi (24) ne’ebé maka sei priense pozisaun hanesan avansadu orgullu tanba bele hetan fatin iha SLB.

“Ha’u atu dehan de’it ida ne’e hanesan prestijiu no onra ne’ebé boot ba ami na’in rua tanba bele hetan fatin iha klube ne’ebé maioria jogadór joven no hosi akademia”, dehan.

Jornalista: Xisto Freitas

Editora: Rita Almeida

HUSIK IDA HATÁN