RÓ AHI “HAKSOLOK” (Feleicidade)

0
769
FOTO Facebook Don Carlos Ximenes Belo

Besik tinan rua nia laran, tempu hahú assina kontratu, iha “Estaleiros Navais de Figueira da Foz (Portugal), haláo konstrusaun ró-Ahi “Haksolok”. Hoirsehik, loron 26 fulan maiu, tinan 2017, iha sidade Figueira da Foz, ho prezensa Dr. Mari Alkatiri, Presidente Autoridade Região Especial Oe-Cusse-Ambeno, Vice-Ministro dos Transportes e Comunicações da República Democratica de Timo-Leste, Eng. Inácio Freitas Moreira, ho tan convidados malae mutin no timor oan, atan ami fó ona  bensaun ba ró no Madre Provincial, Me. Guilhermina hanesan inan sarani; ikus mai, ema tekniku sira  husik HAKSOLOK  tama tasi laran ho seguransa no susessu. Ema hotu hotu ne’ebé assisti serimónia ne’ebá, laran kontente tebes, tanba ita nia Nasaun Timor-Leste iha ró ida kapaz, boot no modernu, atu bele halo ligasaun hosi tasi, hosi Dili ba Oe-Cusse, Ataúro, Indonesia no Australia. Ró “Halsokok” iha kapasidade atu tula ema na’in 377 (tur ka “sentadas”), no viatura karreta sanulu resin lima.

Ho meiu  ida ne’e, ita nia maluk sira hosi Oe-Cusse no Atauro sei la hetan tan susar atu tula sira nia sasan ba prasa Dili no sidade seluk iha Timor Loro Sae laran atu fila liman ka kontratu.

Ho ida ne’e ita agradese bai Nai Maromak ne’ebé fo hanoin ba ukun na’in sira iha Timor-Leste (Hosi Governu sentral no Autoridade Região Especial) atu hola desizaun los nian, hodi hadia’a komunikasaun hosi Dili ba Oe-Cusse no Ataúro. Ita mos agradese ba Na’i Maromak ne’ebé fo néon no kbiit ba ema malae mutin portugés (engenheiros no operários) atu serbisu loron kalan atu remata ró ida ne’e.

Komandante ró áhi Haksolok mak senhor Luís Pité, malae, maibé moris iha Timor. Nia aman uluk sai Administrador do Concelho iha Dili, Oe-Cusse no Baucau. Nia aran senhor António Pité. Señor ne’e hanesan sekretariu iha Baucau, halo liuron Baucau-“Campo de Aviação” (Kuba-laran), sai los hotu kedas. Haruka ema asuliar  sira fera fatuk bot-bot ho “pólvora”. Nia serbisu iha Díli, halo obra barak. Ikus mai, ema tau nia naran ba bairro, iha Colmera nebá, bolu “Bairro Pité”. Ita mos fó obrigado wa’in ba Comandante Lúis Pité, tambá nia mak iha konstrusaun ne’e nia kotuk, loron kalan.

Ró-áhi haksolok nia folin mak ne’e: Euro: 13,7 milhões. Osan barak; maibé, Timor-Leste bele hetan ró diak ida atu serbi timor oan sira. Ita hein katak, loron ida, Governu timor mos bele loke fatin halo ó nian, naran “Estaleiro”, atu hadi’a ró sira no fó serbiu ba ita nia ema foin sa’e sira, mane no feto. Ita nia rai hanesan “Ilha/pulau”, presiza duni “tranportes marítimos” no “transportes aéreos”, atu hasai Timor-Leste hosi “isolamento”. Maíbé, ita la presiza ró-áhi ko aviaun de’it. Nasaun Timor-Leste presiza forma nia ema n’ebe sai tékniku, engenheiros, aviadores ka pilotos. Tempu ida ne’e tempu diak ba labarik, foin sa’e sira atu estuda maka’as, fera ulun, kadi kapasidade isin no néon nian, atu foti Timor Loro Sa’e nia naran nia oin iha rai “Sudeste Asiatico”.

Ró-áhi Haksolok sie halo “experiencia” iha Portugal, no ikus, ho Nai Maromka nia tulun, sei hakur tasi boot sira, liu ba Timor-Leste iha fulan setemmbru mai. Kala, iha fulan outubro laran sei to’o Dili. No iha loron 28 fulan novembru, tinan   2017, sei tama  tasi no portu iha sidade Pante Makasar.

Lia fuan ikus: Parabéns ba Governo Timor-Leste, Parabéns ba Autoridade Região Especial Oe-Cusse-Ambeno, Parabéns ba Comandante Luís Pité, no Parabéns ba Autoridades dos Estalerios Navais de Figueira da Foz!

Porto, 27 de maio de 2017

Dom Carlos Filipe Ximenes Belo

HUSIK IDA HATÁN