Rezolusaun Rekuza PTR Foun Pasa ho Votus 46

0
410
Prosesu votasaun ba projetu rezolusaun kontra nomeiasaun PTR foun. Imajen bankada parlamentár.

DILI, (TATOLI) – Parlamentu Nasionál iha tersa lokraik ne’e aprova ona rezulusaun nú. 33/III hodi rekuza no la ratifika nomeiasaun juiz Deolindo dos Santos ba kargu Prezidente Tribunál Rekursu (PTR). Rezolusaun ne’e pasa ho votu a favór 46, kontra neen no abstensaun 0.

Projetu rezulusaun ne’e halo bazeia ba konstituisaun RDTL artigu 95 númeru 3 aliña A ne’ebé hateten katak nomeiasaun Prezidenti Supremu Tribunál de Justisa presiza hetan ratifikasaun hosi Parlamentu Nasionál.

Biban ne’e, Parlamentu Nasionál aprova mós rezolusaun Nú. 34/III hodi husu ezonerasaun imediata ba Prokuradór Jerál Republika, José da Costa Ximenes atu labele kontinua nia mandatu tanba prokoradór jerál refere komete abuzu poder hodi kria gabinete ida iha nia okos la liuhusi alterasaun ba estatutu.

Parlamentu Nasionál foti aktu ida ne’e bazeia ba Konstituisaun RDTL artigu 86, númeru 3, aliña K no artigu 133 númeru 3 inklui Estatutu Ministériu Públiku artigu 12 númeru 1, 2 no artigu 83. 

Jornalista: Xisto Freitas

Editora: Rita Almeida

HUSIK IDA HATÁN