Projetu Televizaun DTMB Sei Fó Transmisaun Kualidade

0
285
Ministru Negosiu Estranjeiru no Koperasaun, Hernani Coelho reprejenta governu asina akordu ho embaixadór Xina iha salaun MNEK, kuarta, (3/5). Foto António Goncalves

DILI, (TATOLI) – Embaixadór Xina ba Timor-Leste, Liu Hong Yang hateten projetu Televizaun Digital Terresterial Multimedia Broadcasting (DTMB) sei fó transmisaun kualidade definisaun a’as (HD – High Definiction) ba 200.000 espetadór iha Dili no área viziñu.

“Projetu ne’e sé fó programa transmisaun ho kualidade HD ba 200.000 espetadór iha Dili no área viziñu, kanal bele asesu ho di’ak, no sei fó sai diálogu interkultura”, katak iha ambitu asinatura nota intendementu entre Timor-Leste no Xina ba implementasaun projetu Grain Depot and Grain processing facility no projeitu DTMB TV Demonstration iha salaun VIP MNEK, kuarta (3/5).

Tuir embaixadór Xina, projetu ne’e bazéia ba pedidu Governu TL no Governu Xina aseita atu implementa projetu televizaun DTMB. Hodi hatutan, Governu Xina sempre koopera di’ak ho Governu TL ba nesesidade Nasaun no povu.

Iha fatin hanesan, Ministru Negósiu Estranjeiru no Kooperasaun (MNEK), Hernani Coelho hateten televizaun DTMB sei fó oportunidade di’ak ba populasaun tomak atu bele hetan asesu ba informasaun, hanesan xavi ba sira nia dezenvolvimentu rasik, suku no distritu.

Nia dehan tan informasaun iha mundu hanesan buat ida importante tebes, informasaun polítika, edukasaun no promosaun sosiu-kulturál ba povu tomak. SEKOMS iha responsabilidade boot ida atu bele halo aprovetamentu másimu husi kontibuisaun ne’ebé Xina fó atu bele atinji objetivu prinsipál ne’ebé inklui iha programa kooperasaun téknika ne’ebé governu Timor-Leste iha ho Xina.

Governante ne’e informa tan, tempu badak SEKOMS sei hahú programa ida ne’e no hein katak bele la’o ho di’ak no tinan oin bele iha rezultadu husi implementasaun programa ida ne’e.

Partisipante hosi seremónia ne’e mak Embaixadór Xina ba TL, Liu Hong Yang ho nia delegadu sira, MNEK Hernani Coelho, MKIA Constâncio Pinto, SEKOMS Nélio Isaac, Prezidente Konsellu Administrasaun Nasionál Logistik MKIA, Nivio Magalhaes, Prezidente RTTL Milena Abrantes no seluk tan.

Reprejenta governu TL MNEK asina nota atendimentu rua ho embaixador Xina iha TL. Projetu Televizaun DTMB hanesan projeitu ida governu Xina fó ba TL atu implementa bazeia ba kooperasaun téknika entre Nasaun rua.

DTMB hanesan standarte televizaun ida na terminais móveis no uzu fiksu iha Xina, Kuba, Hong Kong no Macau.

Jornalista: Julia Chatarina

Editora: Rita Almeida

HUSIK IDA HATÁN