Projetu Haforsa Reziliénsia atu Kontribui ba Dezenvolvimentu Sustentavel

0
34
Foto google.

DILI, (TATOLI)- Projetu ba haforsa reziliénsia ne’ebé sei hahú husi tinan 2017 to’o 2019 hetan ona asina husi parte Governu liuliu Ministériu Agrikultura no Peska (MAP) ho Organizasaun Nasaun Unida ba Ai-han no Agrikultura (FAO) nomós Uniaun Europea (UE) ne’ebé suporta orsamentu euro milaun 2.000.000 ka U$ 2,185 bazeia ba kambiu atuál.

Asina kontratu projetu ba haforsa reziliénsia liuhusi asaun komunidade afetadu husi bailoro naruk ne’e atu kontribui ba dezenvolvimentu sustentavel iha Timor-Leste, apoiu agrikultór ne’ebé ho eskalaun ki’ik, no ho rekursu limitadu atu adapta no replika teknolojia no prátika konservasaun ba rekursu naturais hanesan bee no rai. Prátika ida ne’ebé hanaran Agrikultura Intelijente ba klima.

Ministru Agrikultura no Peska, Estanislau Aleixo da Silva hatete konvensidu ho projetu tolu hanesan Konvensaun Agrikultura , Jestaun Risku Dezastre iha komunidade no Sistema Informasaun ba Segurans Ai-han.

“Projetu ne’e sei ajuda tebes ministériu ne’e hodi presta servisu di’ak liután ba agrikultór sira. Iha ministériu ne’e ami sei servisu di’ak ona ho FAO hodi promove Konvensaun Agrikultura iha nasaun laran no ha’u mós apresia tebes investimentu ne’ebé Uniaun Europea halo ona estabelesimentu Sistema Informasaun ba Seguransa Ai-han. Fundu ida daudaun ne’e sei tulun liu ministériu hodi habelar, konsolida nomós institusionaliza mellores prátika ne’ebé iha ona”, Estanislau hatete iha Salaun MAP, Komoro, horisehik.

Projetu ida ne’e atu redús pós-kolleta ne’ebé ladi’ak no hadi’ak agro-florestasaun, define planeamentu iha redusaun ba risku dezastre no alerta prekose, hadi’ak abiliodade reziliénsia ba uma-kain 3.000 husi komunidade 21 iha munisípiu hitu mak Baukau, Vikeke, Manatutu, Ainaru, Lautein, Kovalima no Manufahi.

Xefe delegasaun ba UE iha Timor-Leste, Embaixadór Alexandre Leitão hatete Timor-Leste tenke iha agrikultura ne’ebé prezerve kualidade rai no rekursu eskasu hanesan bee.

 “Tan ne’e, presiza atu prodús beibeik iha kualkér kondisaun klima ne’ebé ladi’ak. Ne’e duni agrikultura ne’ebé tuir sinál ne’ebé hatudu tuir tempu nian, sei adapta ho mudansa klimátika ne’ebé to’os na’insira hasoru ona iha tinan hirak liubá”, Alexandre katak.

Reprezentante husi FAO ba Indonésia no Timor-Leste, Mark Smulders hatete El Niño ne’ebé akontese foin lais ne’e hamosu afeta mudansa klimátika nian ba uma-kain grupu risku iha área rurál.

“Tékniku Konservasaun Agrikultura FAO nian ne’ebé implementa hamutuk ho MAF, prova katak efetivu tebes bainhira halo to’os na’in sira sai reziliénte liután hodi hasoru kondisaun bailoro naruk. Fundu husi Uniaun Europea nian ne’e hanesan xave ida hodi haforsa reziliénte ba komunidade rurál, no sei fó posibilidade atu atinje adisionál uma-kain 3.000. Fundu ne’e haforsa mós evidensia baze hodi foti desizaun tuir tempu ne’ebé loloos iha nivel nasionál no lokál, hodi maneza ai-han no nutrisaun iha Timor-Leste”. Mark dehan.

Komponente importante husi projetu ne’e mak konstrusaun armazenamentu bee no konservasaun bee-matan. Atu redús mós prátika tesi ai arbiru no sunu rai ne’ebé halakon fertilidade rai-na’in no dalabarak hamosu ai-han rai ne’ebé lakontroladu.

Tékniku husi MAP sei hetan treinamentu ba rekolla no análize dadaus kona-ba seguransa ai-han no nutrisaun iha populasaun timoraon iha área rurál, nivel nasionál, munisípiu no komunitáriu.

Jornalista: Maria Auxiliadora

Editora: Rita Almeida

HUSIK IDA HATÁN