Projeto Mai Munisípiu Konklui ona Kolaborasaun ho TR

0
59
Juíz Administradór Tribunál Distritál Baukau, Afonso Carmona (iha karuk), Diretora Misaun USAID, Diana Putman, Prezidente Tribunál Rekursu, Deolindo dos Santos, Xefe Ekipa Mai Munisípiu, Carolyn Tanner no Juíz Administradór Tribunál Distritál Oekusi, João Ribeiro (liman loos) iha eventu enserra kolaborasaun Mai Munisípiu no Tribunál Rekursu. Foto, Mai Munisípiu.

DILI, (TATOLI)-Projetu Mai Munisípiu ohin konklui ona ninia kolaborasaun ho Tribunál Rekursu (TR) no apoiu tékniku ba Tribunál Distritál Baukau no Oekusi hafoin  asina nota entendimentu iha Juñu 2014 atu kolabora iha área hadi’ak liután relatóriu estatístiku tribunál no hasa’e asesu ba justisa.

Tribunál Rekursu, Tribunál Distritál Baukau no Oekusi durante tinan hirak nia laran servisu hamutuk iha área kapasitasaun ba juíz sira kona-ba administrasaun no jestaun tribunál, no ofisiál justisa sira kona-ba programa excel avansadu, preparasaun no análiza ba relatóriu funsionamentu tribunál.

Juíz Administradór Tribunál Distritál Baukau, Afonso Carmona hatete, kooperasaun ne’e realiza atividade barak hanesan realiza treinamentu ba juís sira kona-ba administrasaun no jestaun iha Likisá no promosaun ba ofisiál sira halo relatóriu no manuál relasaun ho estatístika ne’ebé tribunál presiza.

“Husi ekipa ida ne’e halo atividade inklui rejistu nesesidade tribunál nia iha Baukau no Oekusi. Entaun tibunál tenta atu informa situasaun sira ne’ebé presiza hetan apoiu husi Counterpart kona-ba sinál sira ne’ebé públiku sira presiza atu asesu ba tribunál,” Afonso hatete iha Tribunál Rekursu, Kaikoli, ohin.

Liuhusi kooperasaun ne’e tribunál halo manuál ida, uza halo relatóriu liuliu kona-ba estatístika no manuál ne’e dadaun iha tribunál Baukau no Oekusi.

Diretora Misaun USAID (United Nation Agency International Development-read), Diana Putman esplika, atu kombate violénsia bazeia ba jéneru iha Timor-Leste nafatin sai hanesan asuntu ida ne’ebé presiza aprosimasaun husi setór oioin hodi konsidera nesesidade husi parte rua hotu, nesesidade vítima ba justisa no kastigu ne’ebé apropriadu ba kondenadu, liuliu ba kazu violénsia doméstika.

“Ami kontente tebes hodi haree katak kampaña hodi hasa’e koñesimentu komunidade nian, inklui mós sira ne’ebé ami-nia parseiru asisténsia legál sira halo iha Baukau, Kovalima, Ermera, Likisá no Oekusi , rezulta daudaun ona iha númeru kazu lubuk ida konsege lori ba tribunál,” Diana apresia.

Aleinde formasaun ba juíz, ofisiál justisa no apoiu tékniku regulár ba Tribunál Distritál Baukau no Oekusi hodi prodús sira-nia relatóriu estatístiku mensál no anuál, Mai Munisípiu mós servisu hamutuk ho tribunál hirak ne’e hodi inisia asaun balun atu hasa’e asesu ba tribunál no informasaun públiku.

Asaun sira ne’e mak dezeña no prodús mapa ba kampaun tribunál ne’ebé hatudu diresaun hotu-hotu iha tribunál laran, kaixa sujestaun atu utilizante sira bele mós fó sira-nia hanoin no sujestaun ba tribunál , kuadru informasaun públiku, banku ba públiku sira hodi tuur bainhira vizita tribunál.

Xefe Ekipa Mai Munisípiu, Carolyn Tanner hatete kooperasaun ida ne’e fó korajen hodi haree espíritu kolaborasaun ne’ebé forte entre tribunál no konsellu suku sira tanba ho koñesimentu ne’ebé forte liu kona-ba prosesu justisa formál, konsellu suku sira bele ajuda komunidade iha baze atu komprende ho di’ak oinsá buka solusaun husi tribunál bainhira iha problema ne’ebé mak lakonsege ka labele rezolve iha nivel komunidade.

Durante períodu kolaborasaun, Mai Munisípiu prodús mós rezumu asesu ba justisa kona-ba tribunál nia funsionamentu, inklui relatóriu temátiku sira husi parseiru Judicial System Monitoring Programme (JSMP) kona-ba sentensa suspensaun iha Tribunál Distritál Oekusi no situasaun asisténsia legál iha Timor-Leste.

(Jornalista : Maria Auxilidora)

(Editór : Manuel Pinto)

 

HUSIK IDA HATÁN