Prezidenti Klube Cacusan Ofisialmente Rezigna án

0
594
Inkontru extraordináriu entre fundadór, eis jogadór no jestór klbue Cacusan iha Becora, domingu ne´e. Imajen Ajénsia Notísia/Xisto Freitas

DILI (TATOLI)—Prezidenti Cacusan Clube Football (CCF), João Maneco Soares ofisialmente rezigna án hosi klube refere liuhusi inkontru extraordináriu entre fundadór sira, eis jogadór no jestaun iha domingu ne´e.

Prezidenti ne´e rezigna tanba fundadór balun krítika nia liuhusi mídia nasionál hafoin nia hasai treinadór Cacusan CF, Clementinho de Carvalho “Vasco” hosi klube refere relasiona ho treinadór ne´e iha jogu dala haat tui-tuir malu iha primeira divizaun Liga Futeból Amadora époka 2017 la atinji pontus 15.

Prezidenti Klube Cacusan, João Maneco Soares

“Vasco hasai esteitmentu iha jornál nasionál balun katak fundadór sira hakarak dada fila fali klube hosi jestór nia liman tanba konsidera ha´u nia desizaun hasai treinadór la prudente. Maibé, ha´u klarifika katak estatutu fó poder ba ha´u atu halo mudansa ruma kuandu treinadór ou saida de´it la fó benefísiu ba klube,” Maneco klarifika ninia argumentu ne´e liuhusi inkontru jerál iha edifísiu klube Cacusan, Becora, Dili.

Nia hatutan, iha Vasco ninia deklarasaun mós sita katak fundadór sira hakarak jere lisuk klube ne´e. Maibé, Nico hatán, osan ne´e sira nian rasik entaun sira la aseita atu fundadór sira mete hodi jere lisuk.

Iha akordu ne´ebé hala´o ho fundadór Cacusan iha 2015 liu-ba molok apuramentu ba Liga Futeból Amadora (LFA) époka dahuluk, Nico haktuir, fó konfiansa pursentu 100 (100%) ba sira hodi jere klube ne´e, maibé fundadór sira ne´ebé asina akordu ne´e maka reklama fali atu dada klube hosi jestór nia liman.

Ne´e duni, eis jogadór Zebra FC deklara katak hahú ohin ba oin nia sei la mete ona klube Cacusan. Karta rezignasaun hosi diretór diriji ona ba órgaun Liga Futeból Amadora (LFA), Sekretaria Estadu Juventude no Desportu nomós fundadór sira klube Cacusan.

Iha biban ne´e, treinadór ne´ebé hanesan mós fundadór no eis jogadór klube Cacusan, Clementinho de Carvalho “Vasco” informa katak liafuan sira ne´ebé nia fó sai iha mídia nasionál ne´e la reprezenta fundadór sira nia naran.

“Ha´u hakarak hateten katak saida maka ha´u ko´alia iha mídia ne´e reprezenta ha´u nia pesoál. Ha´u la kontenti ho desizaun prezidenti tanba jogu primeira faze seidauk ramata maibé nia hasai ona ha´u. Tuir akordu katak só jogu dala hitu ramata maka foin bele halo avaliasaun ba treinadór nia empeñamentu. Maibé, jogu foin la´o dala lima, prezidenti demiti ona ha´u. Ne´e la loos,” Vasco afirma.

Iha inkontru ne´e, fundadór, eis jogadór inklui Vasco konsidera katak problema ne´ebé akontese iha klube ne´e problema kiik ida. Tanba ne´e, sira sujere ba prezidenti atu labele rezigna no prefere atu rezolve problema ne´e tuir tradisaun família ninian. Maske nune´e, sujestaun sira ne´e la konvense prezidenti klube nia desizaun.

Prezidenti nia rezignasaun ne´e afeta ba klube nia preparasaun atu hasoru jogu segunda faze primeira divizaun LFA époka daruak, tanba prezidenti sesante nu´udar mós investór ba klube refere.

Enkuantu, Diretór Kompañia Omega Vivo Sports, Noqy Reis, ne´ebé durante ne´e hamutuk ho prezidenti sesante investe iha klube ne´e sujere ba fundadór no eis jogadór sira atu hili fali prezidenti foun para bele lidera klube ne´e atu hasoru jogu segunda faze ne´ebé sei hahú iha juñu nia laran.

Noqy tenik, administrativamente, nia só garante klube ne´e másimu fulan rua de´it. Hafoin ne´e, nia sei entrega tomak ba iha fundadór no eis jogadór sira atu buka fali investór seluk hodi investe ba klube refere.

Hatán ba kestaun ne´e, fundadór no eis jogadór sira Cacusan iha tempu badak nia laran sei nomeia fali prezidenti klube foun atu garante funsionamentu klube ba tempu naruk nia laran. (Jornalista: Xisto Freitas)

 

HUSIK IDA HATÁN