Prezidente Repúblika Preokupa Tentativa Influénsia Independénsia Judisiál

0
105
Prezidenti Repúblika, Taur Matan Ruak. Imajen Mídia Palásiu Prezidensiál

DILI, (TATOLI) – Prezidenti Repúblika, Taur Matan Ruak preokupa tentativa dezestabilizasaun setór Justisa nian ne’ebé mak hamosu hosi rezolusaun Parlamentu Nasionál kona-ba nomeasaun Prezidente Tribunál Rekursu no Prokuradór Jerál Repúblika.

Taur informa katak prinsípiu independénsia judisiál maka asegura instituisaun demokrátika sira-nia lala’ok regulár, tan ne’e tenke prontu hasoru presaun hirak hosi li’ur no lori povu nia naran halo nafatin justisa nu’udar kna’ar loro-loron nian.

“Tribunál Rekursu oras ne’e daudaun halo hela fiskalizasaun konstitusionalidade ba lei importante lubuk ida, períodu atu hatama kandidatura ba Prezidente Tribunál Rekursu ba eleisaun lejizlativa mós hahú ona no Prokuradoria sei halo hela investigasaun hirak ne’ebé importante. Tanba ne’e maka iha momentu ne’e fundamentál atu apoia ita-nia instituisaun judisiál sira, liuliu hasoru tentativa instrumentalizasaun partidária”, Prezidente ko’alia asuntu ne’e liuhusi komunikadu ofisiál ne’ebé TATOLI asesu hosi mídia Palásiu Prezidensiál, kuarta ne’e.

Tuir eis komandante gerilleiru ne’e katak harii Estadu Direitu la’ós de’it Konstituisaun mak haruka halo, maibé mós solusaun di’ak liu hotu atu harii Estadu ida ne’ebé hetan respeitu no konfiansa hosi sidadaun sira, investidór nasionál no estranjeiru sira no Estadu sira seluk, inklui mós organizasaun internasionál no parseiru sira.

Prezidente Repúblika hein katak sidadaun hotu-hotu tau iha prátika valór sira-ne’e durante debate polítiku nasionál.

Jornalista: Xisto Freitas

Editora: Rita Almeida

Lee mós:http://www.tatoli.tl/2017/05/rezolusaun-rekuza-ptr-foun-pasa-ho-votus-46/

HUSIK IDA HATÁN