PR Lú-Olo Sei Garante Unidade Nasionál

0
129
Prezidenti Repúblika (PR) Timor-Leste ba dahaat, Dr. Francisco Guterres Lú-Olo

DILI (TATOLI)–Prezidenti Repúblika (PR) Timor-Leste ba dahaat, Dr. Francisco Guterres Lú-Olo promete katak nia sei halo buat hotu atu Garante unidade nasionál no funsionamentu normál Estadu nian.

“Durante tinan lima tuir mai, ha’u sei buka promove diálogu no Kooperasaun ho órgaun soberania hotu-hotu, atu órgaun ida-idak bele hala’o ninia kna’ar tui Konstituisaun Repúblika haruka nune’e ida labele hada fali ida seluk Nia kna’ar, maibé sei ko’alia ba malu hodi buka dalan ne’ebé di’ak Liu atu tane ás Estadu no povu nia interesse,” Lú-Olo hato’o liafuan hirak ne’e iha nia deskursu hafoin simu tomada pose nu’udar Prezidente Repúblika periodu 2017-2022 iha Tasi Tolu, Dili, Sesta meia noite.

Nia hatutan Nia sei koopera ho Governu ida ne’ebé de’it atu garante implementasaun programa no planu liuhusi métodu nomós metodolojia efisiente liu, ne’ebé bele garante administrasaun ida ne’ebé la’o lais liu hodi garante ekonomia sustentável.

Aleinde ida ne’e, eis gerileiru informa katak durante ninia mandatu, nia sei buka garante ema hotu-hotu nia partisipasaun iha prosesu dezenvolvimentu polítiku, sosiál, kulturál no ekonómiku no diálogu ho sosiedade sivíl.

“Ha’u hatene katak Prezidenti repúblika maka tenki reprezenta TL iha fórum internasionál, no nia maka hato’o ba liur imajen nasaun nian iha mundu,” Lú-Olo haklaken.

Iha biban ne’e, Prezidenti Repúblika foun atribui medalla colar (medalla ás liu) ba Prezidenti Repúblika sesante, Taur Matan Ruak, ho objetivu valoriza kontribuisaun ne’ebé prezidenti antigu fó ba nasaun dezde tempu rezisténsia to’o ukun rasik án.

(Jornalista: Xisto Freitas)

(Editór : Manuel Pinto)

HUSIK IDA HATÁN