DILI, (TATOLI) – Prezidente Repùblika sesante, Taur Matan Ruak ho Governu liuhosi Primeiru Ministru, Rui Maria de Araùjo akompaña hosi Ministru Koordenadòr sira halo diskusaun kona-ba dezenvolvimentu ikus nian iha Palàsiu Prezidensiàl, tersa, (16/5).
“Ami halo interasaun iha kontextu ba dezenvolvimentu nian iha mandatu tuir mai“, Xefe Governu ba jornalista sira hafoin enkontru.
Diskusaun ne’e, Ministru Koordenador haat aprezenta relatoriu servisu ba Xefe Estadu liliu kona-ba reforma lejislativa, ekonomia no administrasaun iha setòr edukasaun.
“Enkontru ne’e mos halo rezumu ida kona-ba saida mak Governu hala’o durante ida ne’e iha sira nia periodu tinan rua nia laran“, tenik.
Okaziaun ne’e governu mós despede Prezidente Repúblika. “Ohin enkontru ikus entre Prezidente Repùblika lori Governu nia naran agradese ba serbisu hamutuk tinan rua ho balun”, katak.
Xefe Estadu mós agradese ba Governu tanba kolaborasaun servisu konsidera la’o di’ak.
Sorumutu ikus ne’e, Taur Matan Ruak entrega livru konaba rezultadu vízita suku 442 ba lider governante sira ne’e.
Jornalista: Agapito dos Santos
Editora: Rita Almeida