AS Ponta Leste Dudu Académica ba Zona Dezpromosaun

0
50
Kontra atake entre jogadór AS Ponta Leste (costum mean) no Académica FC (costum mutin). Imajen Mídia LFA

DILI, (TATOLI) – Úniku golu hosi Lourenço Ximenes iha minutu 82, konsege lori ekipa As Ponta Leste hetan vitória iha jornada 7 iha primeira volta Primeira Divizaun Liga Futeból Amadora époka 2017.

Vitória ne’e Ponta Leste hetan hafoin manán ekipa Académica FC ho skor 1-0, iha jogu dala ikus ne’ebé maka hala’o iha Estádiu Munisipál Baucau, sábadu (29/4).

Rezultadu ne’e maka lori Ponta Leste túr iha pozisaun lima ho pontu sia hosi jogu hitu ne’ebé ekipa ne’e ultrapasa. Enkuantu, Académica FC monu ba pozisaun hitu, zona dezpromosaun (degradasi) ho pontu lima hosi jogu hitu ne’ebé maka hala’o hosi ekipa istimadu Universidade Nasionál Timor-Lorosa’e ne’e.

“Ha’u sente orgullu maske manán ho 1-0, maibé bele aumenta tan ami nia pontu. Importante liu maka ba iha segunda volta ami perpara-án di’ak liu-tan”, tenik treinadór Ponta Leste, Eduardo Pereira ba jornalista sira hafoin jogu ramata.

Jogu seluk ne’ebé maka hala’o iha loron hanesan, ekipa Zebra FC konsege taka primeira volta ne’e hodi haksoit sai hosi zona dezpromosaun hafoin iha jogu ne’ebé maka hala’o iha Estádiu Malibaka Maliana impata 1-1 ho Carsae FC.

Ho rezultadu ida ne’e maka Zebra FC túr iha pozisaun neen ho pontu neen, hosi jogu hitu. Enkuantu, Carsae FC okupa pozisaun tolu ho pontu 10 hosi jogu hitu ne’ebé maka ekipa ne’e hala’o. 

Jornalista: Xisto Freitas

Editora: Rita Almeida

HUSIK IDA HATÁN