PNTL Kaptura ona Polísia Falsu

0
1482

DILI, (TATOLI) – Servisu Polísia Nasionál Timor-Leste (PNTL) hetan infiltrasaun hosi ema sivíl uza atributu polísia nian hodi hala’o servisu maibé konsege hetan kapturasan.

“Iha fulan balun ba kotuk mós ita iha polísia gadungan (falsu) mós iha, hatais farda PNTL kompletu no halo atividade PNTL iha dalan, maibé ami kaptura ona”, Komisáriu Faustino da Costa informa ba jornalista sira iha kuartel jerál PNTL, Kaikoli, segunda (15/5).

Ho prejensa polísia falsu ne’e mak, komandu husu atu la bele dun naran membru polísia ida bainhira akontese kazu ruma, hanesan akontesimentu kazu iha área Praia dos Coqueros foin lalais ne’e.

Iha kazu Pantai Kelapa nian diskonfia iha involvimentu membru Corpu Seguransa Pessoal (CSP), maibé bainhira komandu simu informasaun no buka tuir, mosu informasaun diferensa liu-liu kor kareta ne’ebé mak deskonfia membru CSP uza.

Ho nune’e komandu husu atu entrega ba prosesu tomak mak foin bele justifika nia verdade, labele naran dun membru PNTL sira tanba tuir infomasaun hatete, kareta kor nune’e, hakerek letra CSP, maibé realidade kareta ne’ebé deskonfia ne’e nia kor la uniform ho kareta CSP nian durante ne’e.

“Ami sei buka tuir nafatin para detekta, tanba iha fulan balun kotuk ita iha polisia gadungan ne’e mos iha hatais farda PNTL kompletu halo atividade iha dalan no ita kaptura, ne’e la’ós defende PNTL”, hatutan.

No husu ba públiku sira bainhira asiste ou hetan asaun krime ruma ne’ebé mak presiza PNTL sira nia tulun husu liga ba dirasaun 112 ne’ebé mak kompaña Timor-Telekom, Telemor ho Telkomcel fornese ba PNTL iha teritoriu Timor laran tomak. Maibé bainhira públiku sala utiliza númeru 112 ba buat halimar, automatikamente kompaña telekomunikasaun sei blokeia kartaun SIMCARD.

Entertantu ba númeru asidente iha semana kotuk liu ba, PNTL rejista kazu hamutuk 33 kazu ne’ebé rejulta ema ida mate iha munisípiu Baucau, kanek kman nain 22 no sanulu resin kanek todan.

Jornalista: Manuel Pinto

Editora : Rita Almeida

HUSIK IDA HATÁN