PNTL Hasai ona Membru Indisiplinár 200 resin

0
1076
Superintendenti, Arquimino Ramos ko'alia hela ho kandidatu PNTL iha sentru formasaun Komoro. Foto midia PNTL

DILI (TATOLI) – Polísia Nasionál Timor-Leste durante ne’e demite (hasai-red) membru hamutuk nain 200 resin tanba komete kazu indisiplinár bainhira hala’o kna’ar nu’udar lutu ba Nasaun.

Komandante Sentru Formasaun PNTL, Superintendente Arquimino Ramos dehan membru sira ne’e tenke simu konsikuénsia ba hahalok ne’ebé mak komete.

“Sira halao servisu la tuir lei ne’ebé mak iha, tanba ne’e tenke simu konsikuénsia ba aktu ne’ebé mak sira komete”,  Superintendenti ba jornalista sira iha sentru formasaun PNTL, Komoro, kinta (11/5).

Futuru polísia bele halo atuasaun iha terenu ho professionál, responsavel sentru formasaun sei buka meus oin-oin hodi hadi’a kurikulum, nune’e materiál ne’ebé mak hanorin ba kandidatu no polísia bele koresponde ba realidade.

“Ita hanorin ne’e, hanorin lei, hanorin tékniku polísia nian, sira sai iha ona kuñesimentu atu servi ba ita nia rain”, Arquimino haktuir.

Husu nafatin atu membru ne’ebé sei ativu hala’o kna’ar tenke respeita direitu úmanu. Sira ne’ebé sai ona, la signifika labele kontribui ona ba Nasaun nia dezenvolvimentu, maibé bele kontribui iha servisu seluk hodi servi sosiedade.

“Polísia barak mak sai, balun agora sai emprezáriu boot”, fó ezemplu.

Entertantu iha sentru formasaun iha loron 15 fulan ida ne’e sei halo tan prova médiku ba kandidatu hamutuk nain 200 hodi hahú formasaun ba kursu ajente.

Kandidatu ne’ebé mak la marka prejensa iha loron determina, sentru formasaun konsidera iliminadu.

Periudu ezame sei hala’o iha loron 15 to’o maiu, nune’e husu ba kandidatu sira atu marka prejensa hodi tuir teste, órariu ne’ebé mak iha.

Kada loron ida sei halo teste ba ema nain 15 de’it. Hahú tuku 05.00 dader ho kondisaun jejun. Kriteriu seluk, kandidatu tenke solteiru, ida ne’e reguladu hosi artigu 39 no 3 diploma ministeriál 2011, kona-ba konkursu públiku.

Sira ne’ebé mak hela hamutuk ona iha uma ida tantu feto ka mane no feton iha oan maibé seidauk kaben iha Igreja ida ne’e mós sentru formasaun sei lakonsidera hanesan solteiru.

Seluk fali mak kandidatu sira ne’e bele kondenadu ba tipu krime saida de’it, maibé komete ona krime sei la elijivel ba kursu.

“Ohin ne’e avisa ikus, kandidatu mai keta haluha lori ho kartaun eleitorál, husu para kumpri kriteiru sira ne’ebé mak sentru formasaun fó sai”, salienta.

Jornalista: Manuel Pinto

Editora: Rita Almeida

HUSIK IDA HATÁN