PNTL–F-FDTL Labele Abitua Rezolve Konflitu ho Kilat

0
247
Ulun boot F-FDTL, Lere Anan Timur bainhira hasoru malu ho Xefe Estadu, Taur Matan Ruak. Foto dokumentasaun mídia Prezidensia Repúblika

DILI, (TATOLI) – Xefe Estadu Maior FALINTIL-FDTL, Maijór Jenerál Lere Anan Timur husu ba membru Polísia Nasionál Timor-Leste no FALINTIL-FDTL labele abitua uza kilat hodi tiru populasaun bainhira mosu konflitu.

Lere Anan Timur hato’o deklarasaun ne’e relasiona ho joven ida ne’ebé mate iha Bebonuk sabadu (6/5).

“Ba ha’u nia forsa, kuandu ba populasaun nia le’et lalika uza kilat tanba kilat la’ós tempu, kilat ne’e kuandu iha funu maka ita ka’er atu rezolve problema, kuandu ema ka’er kilat responde ho kilat maibé tuku malu entaun ba tuku malu ho nia”, dehan nia iha Palásiu Prezidensiál Bairopite Dili, kuarta (10/5).

Hodi hatutan: “Tantu PNTL no F-FDTL abitua ita nia komunidade sira labele konfia demais kilat ne’e”.

Membru PNTL no F-FDTL mesak treinadu tanba ne’e tenke rezolve problema ho profesionalizmu liutan.

Estabilidade sai fatór importante hodi  dezenvolve Nasaun tanba ne’e tenke hamenus krime no konflitu iha rai laran.

Fatin hanesan Ministru Interior, Longuinhos Monteiro hateten governu sei la-interven servisu justisa ba kazu Bebonuk.

“Ita nia servisu judisiál sira hala’o hela investigasaun tanba ne’e ha’u labele ko’alia buat ne’ebé sei iha prosesu investigasaun, mesmu ita hatene no rona, maibe ha’u entidade ne’ebé atu presta informasaun hirak ne’e”, dehan MI.

 Jornalista: Agapito dos Santos

Editora: Rita Almeida

HUSIK IDA HATÁN