PN Aprova Ona Rezolusaun Estabelese Sede G7+ iha TL

0
104
Imajen Parlamentu Nasionál (PN) aprova rezolusaun estabelese sede G7+ no ratifika karta G7+. Foto espesiál

DILI (TATOLI)—Parlamentu Nasionál (PN) iha Kuarta ne´e aprova ona rezolusaun númeru 12/III (3a) establesementu sede G7+ iha Repúblika Demokrátika Timor-Leste (TL) no rezolusaun 13/III (3a ) ratifika karta G7+.

Organizasaun G7+ nu´udar Organizasaun Internasionál Intergovernamentál ne’ebé konstrui hosi nasaun 20 nu´udar nasaun frajíl no nasaun postu konflitu.

Timor-Leste nu´udar nasaun fundadór ba G7+ ne’ebé ho objetivu atu halo diálogu ho parseiru dezenvolvimentu, diálogu entre nasaun membru sira hodi hametin páz iha mundu.

Diskusaun maka´as ba rezolusaun rua ne’e iha Plenária Parlamentu Nasionál, deputadu sira bankada FRETILIN kestiona artigu 11 ne´ebé ko´alia kona-ba priviléjiu no imunidade ba membru sira ne’ebé serbisu ba organizasaun G7+, tanba liga ho Eis Ministra Finansas, Emília Pires ne’ebé infrenta hela justisa no benefisiu iha aspeitu politika ekonomia ba Timor-Leste, inklui sustentablidade organizasaun ne’e rasik.

Entretantu, governu ne´ebé reprezenta hosi Minstra Finansas Santina Cardoso no Ministru Obras Públikas, Gastão Sousa esplika katak artigu 11 hosi rezolusaun ne’e sei la aplika ba eis Ministra Finansas, Emilia Pires ne´ebé infrenta hela justisa tanba nia la´ós ona membru G7+.

Organizasaun Internasionál Intergovermental G7+ kompostu hosi Timor-Leste, Afganistão, Burundi, Repúblika Centro-Africana, Chade, Comores, Costa do Marfim, República Democratica do Congo, Guiné, Guiné-Bissau, Haiti, Libéria, Papua Nova Guiné, Serra Leoa, Somália, Ilhas Salomão, São Tomé Príncipe, Sudão do Sul, Togo no Iémen. (Jornalista: Xisto Freitas)

 

HUSIK IDA HATÁN