PM Rui Husu PR Lú-Olo Kolabora ho Governu

0
148
Primeiru Ministru, Dr. Rui Maria de Araújo ko´alia ba jornalista sira iha Palásiu Prezidénsia Repúblika, Kinta ne´e. Imajen Ajénsia TATOLI/Xisto Freitas

DILI (TATOLI)—Primeiru Ministru (PM), Dr. Rui Maria de Araújo husu ba Prezidenti Repúblika, Dr. Francisco Guterres Lú-Olo atu kolabora ho governu para bele fasilita dezenvolvimentu la´o di´ak iha nasaun ne´e.

“Governu hato´o ba prezidenti repúblika atu kolabora di´ak entre instituisaun rua. Governu disponível nafatin atu hato´o lala´ok dezenvolvimentu ba prezidenti repúblika bainhira xefi estadu presiza,” Rui ko´alia asuntu ne´e ba jornalista sira iha Palásiu Prezidénsia Repúblika, Bairu-Pité, Dili, Kinta ne´e, hafoin xefi governu hamutuk ho ministru koordenadór sira komprimenta Prezidenti Repúblika, Dr. Francisco Giuterres Lú-Olo.

Rui haktuir katak Prezidenti Repúblika manifesta ninia presu (valorizasaun) ba buat ne´ebé governu halo ona.

Iha okaziaun ne´e, nia informa, sira mós ko´alia kona-ba kestaun espesífiku balun maka fórma lejizlativa no fórma ekonómika ne´ebé prepara atu halo diversifikasaun ekonomia iha rai ida ne´e.

Eis Ministru Saúde hatutan asuntu espesífiku seluk ne´ebé ko´alia naruk oituan maka prosesu Delimitasaun Difinitiva Fronteiras Marítima ninian, inkontru sira ne´ebé parte rua (Governu TL no Austrália) hala´o ho Komisaun Konsiliasaun ne´ebé reuniaun tuir mai sei hala´o iha juñu nia laran.

“Prezidenti repúblika rasik hato´o katak mantein nia konfiansa ba governu liu-liu ba negosiadór prinsipál, Kay Rala Xanana Gusmão nomós ajente prinsipál, Ministru Ágio Pereira, atu kontinua prosesu negosiasaun,” Rui haklaken.

Iha inkontru ne´e, xefi estadu no xefi governu konkorda katak inkontru regulares prezidenti repúblika no governu sei mantein nafatin iha semana-semana bainhira prezidenti repúblika presiza ,” nia tenik.

Ministru koordenadór sira ne´ebé hola parte iha sorumutu ho prezidenti repúblika maka Ministru Estadu no Prezidénsia Konsellu Ministru, Ágio Pereira, Ministru Koordenadór asuntu Ekonomia no Ministru Agrikultura no Peskas, Estanislau Aleixo da Silva no Ministru Koordenadór asuntu Sosiál no Ministru Edukasaun, António da Conceição.

(Jornalista: Xisto Freitas)

(Editór : Manuel Pinto)

 

 

HUSIK IDA HATÁN