PM Aseita Pedidu Kalbuady Lay La-Simu Salariu

0
752
Foto GPM

DILI, (TATOLI) Primeiru Ministru, Rui Maria de Araújo aseita pedidu hosi Ministru Turismu Arte no Kultura (MTAK), Francisco Kalbuadi Lay hodi husu lisensa sem vensimentu durante fulan rua, nune’e partisipa kampaña eleisaun parlamentár.

“To’o oras ne’e seidauk iha membru governu ida mak hato’o karta lisensa ba ha’u, maibé iha de’it membru Governu ida mak hatama ona nia karta lisensa mak Ministru Arte Kultura, Francisco Kalbuadi Lay”, hatete Xefe Governu ba jornalista sira iha Palásiu Governu, segunda (29/5).

Iha karta ne’e husu atu suspende mós salariu durante fulan rua. “Supensaun ne’e signifika nia para, la-halo nia servisu hanesan ministru, vensimentu mos para, depois Sekretariu Estadu Arte Kultura mak asume ninia papel”, esklarese.

Nia rekoñese membru governu maioria husi Partidu Polítiku. Pontu importante ida klaru  membru governu sira iha afiliasaun polítiku partidaria, tuir lei ne’ebé iha  bainhira  membru Governu ne’e ba kampaña tenke hato’o karta suspensaun ba funsaun ka husu ferias hodi la-afeta ba funsionamentu makina Estadu”, realsa.

Ministru Francisco Kalbuadi Lay sei hahú lisensa iha fulan-juñu to’o eleisaun remata iha fulan-jullu 2017.

Eleisaun Parlamentár sei hala’o iha loron 22 fulan-jullu, tanba ne’e kampaña ba eleisaun parlamentár sei hala’o iha loron 20 fulan-juñu no sei remata iha fulan-jullu.

Jornalista: Agapito dos Santos

Editora: Rita Almeida

HUSIK IDA HATÁN