PARABENS Nai Prezidenti da Repúblika ‘Lú-Olo’

0
163
Prezidenti Repúblika, Dr. Francisco Guterres Lú-Olo iha oin, kotuk Prezidenti Parlamentu Nasional, Aderito Hugo no iha Sorin Prezidenti Republika Sesante Taur Matan Ruak. Foto TATOLI. Dasiparu

DILI (TATOLI)–Hein tan de’it oras balun, Prezidenti eleito Francisco Guterres Lú-Olo ofisialmente simu transferensia poder hosi Prezidenti datoluk (Sura restaurasaun Independensia) Taur Matan Ruak hodi kontinua ka’er estadu no povu Timor-Leste hanesan Prezidenti dahat iha jornada Timor-Leste nian durante periudu (2017-2022).

Seremonia toma da pose Prezidenti Lú-Olo. Timor-Leste selebra mós komemorasaun tinan 15 restaurasaun independensia Timor-Leste ne’ebé monu iha loron 20, Maiu, 2017.

Iha munuti istoriku ida ne’e, esperansa nasaun no estadu Timor-Leste nian simplesmente mak Prezidenti Lú-Olo simu knaar ho responsabilidade, nu’udar símbulu no garantia independénsia nasionál no unidade Estadu nian, no  instituisaun demokrátika sira-nia funsionamentu regulár tuir Artigo 74 Konstituisaun RDTL hatete.

Ka’er ba natureza artigo 74 ezije firmeza Prezidenti dahat nian atu sai nu’udar simblu unidade nasionál, maske orijinalidade Prezidenti Lú-Olo hanesan figura Partidu FRETILIN.

Lú-Olo tenki mantein relasaun ármonia, no esperitu koperativu hodi tulun instituisaun demokratiku seluk hanesan Governu, Parlamentu no Tribunál atu hala’o ida-idak nia funsaun tuir mandatu hosi konstituisaun ho koperasaun ne’ebé mútua.

Aleinde ida ne’e priomove ármonia iha relasaun instituisionál, nu’udar xefi do estadu, i sai hanesann inisiador no kordenador ba relasaun servisu hamutuk entre orgaun soberañu sira.

Buat hirak ne’e hotu, Fasil bainhira ita koalia, maibé defisil atu tau iha pratika bazeia ba hanoin hirak iha leten, tanbe nu’udar Xefi do estadu, Lú-Olo tenki koloka án hanesan operador di’ak hodi jere intreses polítiku sira ne’ebé loke dalan ba tendensia konflitu de intreses entre orgaun soberañu sira.

Dalan mesak minimiza konflitu de intreses, tenki halo esforsu atu hamenus hahalok “loko-an”  entre orgaun soberañu liu-liu hahalok sira ne’ebé iha tendensia hodi sobu estabilidade defesa no seguransa hodi ikus mai fó konsikuensia ba prosesu dezenvolvimentu Timor-Leste ne’ebé sustentavel.

Iha âmbito asegura estabilidade dalan ida mak Prezidenti da Repúblika tenki hatur intreses comun iha intreses grupo ka partidu nia leten.

Hein katak ema estadista hanesan Prezidenti Lú-Olo durante nia mandatu sei halao nia funsaun hanesan kordenador, operador no inisiador hodi garante ármonia iha intrasaun ba relasaun entre orgaun soberañu sira, tanba Lú-Olo sai Prezidenti ba povu tomak maske antes Partidu mak lori nia.

Nune’e mós atu konkratiza kompetensia konstitusionál, nu’udar Prezidenti, fatór posetivu ba Lú-Olo iha futuru mai mak durante mandatu Lú-Olo tenki halo esforsu tomak hodi iha ekilivru ba pensamentu Unidade nasionál.

Povu Timor-Leste tomak sei fó apoia tomak ba Nai Prezidenti Fransisco Guterres Lú-Olo ho esperansa katak Lú-Olo nu’udar ema estadista ida atu lori Timor-Leste integra iha ASEAN nune’e mós sai hanesan aman nasaun ne’ebé sei akompaña ho dudu prosesu Luta ba Fronteira maritima entre Timor-Leste ho Aústralia.

Parabens eh Bom Traballu ba Prezidenti da Repúblika ne’ebé sei harii Timor ida de’it, Timor Dame no Timor Prosperu.

(Editorial)

HUSIK IDA HATÁN