Orsamentu Retifikativu Sei Monu ba Governu Foun

0
123
Diretór Nasionál Orsamentu Estadu, Salomão Yoaquim. Foto/Egas Cristovão.

DILI, (TATOLI) – Preparasaun ba prosesu Orsamentu Retifikativu 2017 no Orsamentu Jerál Estadu (OJE) 2018, polítikamente sei monu ba governasaun foun.

Diretór Nasionál Orsamentu Estadu, Salomão Yoaquim ba TATOLI iha edífisiu Ministériu Finansa (MF), Aitarak-Laran informa, daudaun ne’e tékniku MF ajusta ona kalendáriu no prepara dadus lubuk ida para Governu foun mai aprezenta para fasilita sira-nia desizaun oinsá bele lais no elabora retifikativu labele lori tempu naruk.

“Ami kria ona ekipa rua, ekipa kiik ida atu haree ba retifikativu no ekipa seluk atu atende foku ba Orsamentu Jerál 2018 nian. Ekipa rua ne’e kuandu retifikativu remata ona, ekipa retifikativu tama filafali ho ekipa Orsamentu Jerál Estadu nia para hamutuk dudu OJE ho tempu ne’ebé limitadu katak imposivel OJE 2018 ita hato’o ba Parlamentu iha Outubru”.

Entantu iha Lei Orsamentu Estadu hatete iha loron 15 Outubru, Governu hato’o proposta ba Parlamentu Nasionál maibé iha klaúzula ne’e ladehan katak tenke, maibé bele mós tanba iha komplesidade tempu entaun Governu sei hato’o  pedidu para prolonga tempu hodi elabora diskusaun OJE bele halo iha dezembru, janeiru ka fevereiru depende ba preparasaun.

Daudaun ne’e, Governu atuál iha ona esforsu másimu hodi prepara dadus para fasilita govenasaun ne’ebé sei mai ne’e iha prosesu Orsamentu Retifikativu ho OJE 2018.

Tuir kalendáriu, Orsamentu Retifikativu hahú iha fulan-Agostu maibé desizaun ne’ebé fó sai iha reuniaun Konsellu Ministru bainhira MF aprezenta kona-ba estratejia oinsá iha preparasaun ba Orsamentu Retifikativu no OJE 2018 hodi hatene loloos desizaun oinsá atu ajusta fali kalendáriu no iha enkontru ne’e foti konkluzaun ida katak preparsaun monu ba governasaun foun no tentativa kalendáriu ne’ebé trasa sei akontese iha agostu ka setembru.

Jornalista: Maria Auxiliadora

Editora: Rita Almeida

HUSIK IDA HATÁN