Ohin, TL Lidera Konferénsia G7+

0
173
Ilustrasaun

DILI, (TATOLI) — Durante loron rua hahú ohin to’o aban, Timor-Leste (TL) nu’udar uma na’in ba Konferénsia globál kona-ba ajenda tinan 2030 nian.

Tuir komunikadu, konferénsia ne’ebé sei hala’o iha Sentru Konvensaun Dili sei halibur desizór polítiku sira nível aas nian ne’ebé pertense ba governu sira, parseiru dezenvolvimentu no organizasaun sosiedade sivil nian sira.

Konferénsia ne’e sei reprezenta plataforma ida hodi debate dezafiu sira, fahe lisaun no prátika di’ak nian sira kona-ba aplikasaun Ajenda tinan 2030 iha nasaun frajil no Estadu afetadu sira husi konflitu.

Tema ba konferénsia ne’e mak: “Roteiru ida ba Objetivu sira Dezenvolvimentu Sustentavel iha nasaun sira frajil no afetadu husi konflitu”.

Eventu hanesan, organiza ona iha parseria ho membru sira husi grupu Informál Apoiu Nílvel Aas nian ba Objetivu sira Dezenvolvimentu Sustentavel no ho Sekretariadu g7+.

Entretantu ajenda ba konferénsia ne’e, iha loron dahuluk, hala’o ona sorumutuk nível aas ba responsável polítiku sira, iha ne’ebé maka sei debate tema jerál sira Ajenda 2030 nian ne’ebé aplika ba Estadu frajil no afetadu sira husi konflitu.

Iha sorumutuk ne’e nia rohan, sei halo aprovasaun ba deklarasaun ida ho rezolusaun prinsipál sira no kompromisu husi partisipante sira.

Loron daruak sorumutuk ne’e nian sei hala’o diskusaun téknika kona-ba abordajen ne’ebé di’ak liu ba hametin mekanizmu kooperasaun nian ida entre estadu frajil no afetadu sira husi konflitu, ne’ebé fó dalan ba sira hodi alkansa objetivu sira dezenvolvimentu sustentavel nian.

Abordajen ida ne’e sei sai hanesan baze ba esperiénsia globál estadu frajil no kooperasaun súl-súl (prosesu kona-ba ligasaun polítika no interkámbiu ekonómiku, sientífiku, teknolójiku, kulturál no área sira seluk, entre nasaun sira ne’ebé iha dezenvlovimentu).

Parseiru sira konferénsia ida ne’e nian maka g7+, governu Suésia no Zelándia-Foun, Komisaun Europeia, Banku Izlámiku Dezenvolvimentu nian, PNUD, Embaixada Estadu Unidus nian iha Timor-Leste, Kámara Komérsiu no Indústria Timor-Leste nian.

Iha loron dahuluk, sei iha konferénsia no espozisaun kona-ba diversifikasaun ekonómika no loron tuir mai sei iha konferénsia kona-ba programa saúde iha família.

Jornalista: Rafy Belo

Editora: Rita Almeida

HUSIK IDA HATÁN