Negosiante-Emprezáriu Presiza Hatene Instrumentu Legál

0
92
Diretór SERVE, Florêncio Sanches. Foto Tatoli/Egas Cristovão

DILI, (TATOLI) – Instituisaun haat hanesan Servisu Rejistrasaun no Verifikasaun Emprezariál (SERVE), Ministériu Komérsiu Indústria no Ambiente (MKIA), Autoridade Munisipál Dili, no Kámara Komérsiu Indústria Timor-Leste (KKI-TL) halo divulgasaun konjunta sobre Dekretu Lei númeru 51/2016, Dekretu Lei númeru 35/2012 no 7/2017 sobre SERVE nian no Dekretu lei númeru 24/2011 kona-ba lisensiamentu komersiál ba emprezáriu sira.

Diretór SERVE, Florêncio Sanches hatete polítika Governu mak atu fasilita no promove mas la’ós ho verbál maibé ho regulamentu, tanba ne’e Iha tinan 2017 Governu prodús tan lei ida númeru 7/2017 ne’ebé fó kompeténsia ba SERVE atu loke nia sukursál iha territóriu tomak atu fasilita sira husi munisípiu lapresiza hakat mai iha Dili atu halo rejistu.

Nune’e mós atu apár ho lei sosiedade komersiál ne’ebé iha mudansa boot tanba lei ida antigu iha tipu haat ne’ebé ké todan.

“Entaun lei foun ne’e hatete hasai tipu haat ba rua de’it mas ita labele implementa nonook de’it tanba ne’e ita halibur iha fórum atu fó hatene ba sira kuandu implementa mak hetan buat ruma laloos katak lei mak haruka mas la’ós pesoál husi Governu mak halo”, Florêncio katak iha salaun Ministériu Soliedariedade Sosiál, ohin.

Enkuantu lei ne’e iha lamentasaun tanba iha pontu barak ne’ebé ladún apár ho negosiante ka emprezáriu sira-nia hakarak nune’e parte relevante hato’o ba Governu maibé presiza tempu.

“Ezemplu Dekretu Lei 35/2012 atu halo nia revizaun presiza tinan tolu ho balun, agora daudaun foin bele halo, tanba ne’e mak Dekretu Lei foun sira sente katak ladún kona sira-nia atividade ekonómika sira hatete no ita hato’o maibé desizaun liuhusi prosesu Konsellu Ministru ba Parlamentu mak tuun filafali mai”.

Tuir instituisaun haat ne’e katak iha importánsia atu halo públiku liuliu negosiante, emperzáriu sira hatene kona-ba instrumentu legál sira ne’ebé mak iha relasaun servisu entre instituisaun sira ne’e.

Instrumentu legál hanesan baze ba sidadaun ida-idak hodi la’o tuir no hatene ka konxiente ho sira ida-idak nia devér no direitu iha moris loroloron no lakria impkatu negativu ba ema ida ka sosiedade ida.

Divulgasaun ne’e atu halo negosiante ka emprezáriu sira hatene kona-ba devér saida mak sira presiza atu halo bainhira hala’o sira-nia negósiu no atividade ekonómika sira no asegura mós sira-nia direitu bainhira hala’o sira-nia negósiu.

Divulgasaun informasaun ba emprezáriu sira ne’e mak Dekretu Lei númeru 35/2012 ne’e kria SERVE hanesan serbisu públiku ida ne’ebé funsiona iha balkaun-úniku ida, hala’o rejistu no hasai lisensa ba negósiu no kompañia sira iha fatin ida de’it hodi fasilita no halo lalais rejistu no atividade ekonómika.

Dekretu Lei númeru 24/2011 nia objetivu atu harii regra sira ba asesu hala’o atividade komersiál no kontribui ba ordenamentu no modernizasaun infraestrutura sira husi negósiu ka atividade ekonómika ne’ebé eziste tiha ona, nune’e mós proteje konkorénsia ida ne’ebé livre no leál entre komersiante sira no salvaguarda direitu konsumidór sira-nian ne’ebé harii tuir lei (artigu 1o-DL 24/2011)

Dekretu Lei númeru 51/2016 harii kondisaun sira no kritériu ne’ebé regula lala’ok hodi hato’o mensajen publisitária sira ne’ebé hato’o ba ema ka grupu ruma, haree iha fatin públiku no ema bele hatene kona-ba instituisaun ruma ka programa no atividade liuhusi materiál publisitáriu no fó lisensa hodi publika mensajen ba públiku no regula kona-ba fatin nomós medida, determina prazu no folin ba publisitáriu nian.

Jornalista: Maria Auxiliadora

Editora: Rita Almeida

HUSIK IDA HATÁN