MUTL Konsidera Alterasaun Lei Pensaun Vitalísia “Injustisa”

0
78
MUTL bainhira organiza konferénsia imprensa iha Kampus Sentral UNTL, ohin, kuarta (3/5). Foto Tatoli/Rafy Belo

DILI, (TATOLI) – Movimentu Universitáriu Timor-Leste (MUTL), ohin liuhosi konferérensia imprensa iha kampus sentrál, Universidade Nasionál Timor Lorosa’e konsidera alterasaun lei pensaun mensál vitalísia nafatin husik injustisa ba povu.

MUTL mós konsidera lei ne’e la promove igualidade sosiál. Tanba ne’e,  MUTL liuhusi nia portavóz, Faustino Soares husu ba Prezidente Repúblika, Taur Matan Ruak hanesan mós funu na’in ba libertasaun pátria no povu kontinua manten pozisaun hodi kontra.

Prezidente Repúblika eleitu, Francisco Guterres Lú-Olo atu uza poder hanesan Xefe Estadu atu promove dialogu ho Parlamentu Nasionál hodi halo fali revizaun, nune’e bele hatuur sosiedade iha justisa sosiál, haki’ak sidadaun moris di’ak ba isin no klamar.

MUTL husu mós ba líder revolusionáriu sira atu kontinua refleta Nasaun nia istória katak kuadru superiór no médiu barak mate hamutuk ho povu ba kauza libertasaun.

Husu ba deputadu labele husik Parlamentu Nasionál sai fatin ida ne’ebé nia povu rasik mak hakilar loron kalan ba kesatun privilejiu no regalia sira maibé presiza hatuur integridade no kredibilidade nu’udar órgaun lejítimu povu nian.

MUTL mós bolu atensaun ba povu katak polítiku sira lori ona povu no Nasaun nia a favór ba benefísia de’it grupu elite duke harii sistema servisu públiku hodi garante edukasaun, saúde no moris seguru ba povu maioria.

MUTL hateten katak nu’udar povu tenke haree lala’ok polítiku sira-nia attitude ho atensaun ne’ebé rigor nune’e evita dezvia povu nia rekursu ba interese no hariiku polítiku.

Entretantu ejizénsia sira ne’e kontinua la tau konsiderasaun, sira sei hato’o nafatin preokupasaun liuhusi eventu oioin nomós halo edukasaun sívika ba povu katak presiza revizaun eh halakon lei pensaun vitalísia ne’e.

Tanba rezultadu mudansa ba lei kontinua propoin pensaun ba eis-prezidente repúblika pursentu 100, eis-titulár no seluk tan tuun de’it ba pursentu 90 no ba eis-deputadu no eis-membru governu sira tuun de’it ba pursentu 60.

Jornalista: Rafy Belo

Editora: Rita Almeida

HUSIK IDA HATÁN